Áŋgiruššansuorgi 2: Transolbmot ja olbmot, geaid sohkabealli ii kongruere identitehtain

Mihtut:

• Ovttaárvosaš almmolaš bálvalusat transolbmuide ja olbmuide, geaid sohkabealli ii kongruere identitehtain
• Ollislaš regiovnnalaš dikšofálaldagat
• Lasihit máhtu mo transolbmot ja olbmot, geaid sohkabealli ii kongruere identitehtain, vásihit bargoeallima, vai sihkkarastet eanet fátmmasteaddji bargoeallima
• Eanet dohkkeheami transolbmuide ja olbmuide, geaid sohkabealli ii kongruere identitehtain

Doaibmabidju 37: Čohkket máhtu transolbmuid bargoeallinvásihusain

Ráđđehus áigu almmuhit ohcan láhkai prošeavtta, mas čohkkejit máhtu transolbmuid bargoeallinvásihusain stáhta tariffaguovllus.

Doaibmabidju 38: Gárvet ollislaš, regiovnnalaš dikšofálaldaga olbmuide, geaid sohkabealli ii kongruere identitehtain

Regiovnnalaš dearvvašvuođadoaimmahagat galget dievasmahttit dikšofálaldaga ásaheami olbmuide, geaid sohkabealli ii kongruere identitehtain, ovttasráđiid geavaheddjiiguin, suohkaniiguin, dearvvašvuođadoaimmahagaiguin ja Oslo universitehtabuohcciviesu DF nationála dikšofálaldagain. Lassin dasa ahte čielggadit ja dikšut pasieanttaid, geaid sohkabealli ii kongruere identitehtain, regiovnnalaš fálaldagat galget searvat máhtolašvuođaovddideapmái spesialisttadearvvašvuođabálvalusas ja suohkaniid dearvvašvuođa- ja fuollabálvalusas. Regiovnnalaš ovttadagat galget deattuhit diehtojuohkima báikkálaš dearvvašvuođadoaimmahagaide ja suohkaniid dearvvašvuođa- ja fuolahanbálvalusaide ja bagadallat daid diagnosaid, divššu ja pasieantamannolaga ektui, go pasienttaid sohkabealli ii kongruere identitehtain.

Doaibmabidju 39: Árvvoštallat mo nannet davviriikkalaš ovttasbarggu divššu ektui, mii addo olbmuide geaid sohkabealli ii kongruere identitehtain

Obbalaččat dárbbašuvvo eanet dutkan, máhtolašvuohta ja gelbbolašvuohta sohkabealleinkongruenssa birra ja mo iešguđetlágan dilálašvuođat berrejit čielggaduvvot ja dikšojuvvot dearvvašvuođabálvalusas. Seammás álbmogis eai leat ollu olbmot, geaid sohkabealli ii kongruere identitehtain ja fágabirrasat leat smávvát. Dat čájeha man mávssolaš buorre fágalaš ovttasbargu riikkarájáid badjel lea. Ráđđehus áigu árvvoštallat mo sáhtášii nannet davviriikkalaš ovttasbarggu sohkabealleinkongruenssa dikšuma ja dutkama olis.

Doaibmabidju 40: Nannet doaimmaid buohtalastima almmolaš sektoriid rájáid rastá vai buorebut čuovvolit olbmuid, geaid sohkabealli ii kongruere identitehtain

Ráđđehus galgá bargat dan ovdii ahte nannet iešguđet sektoriid ovttasbarggu ja bálvalusaid koordinerema olbmuide, geaid sohkabealli ii kongruere identitehtain.