-Ovttasbargoráđđehus lea oallut doaimmaid álggahan ulbmiliid olahit maid bijaimet sámepolitihkas. – Ollašuvvan mihttomearit maid mun erenoamážit hálidan ovdangeassit lea finnmárkkuláhka, ráđđádallanprosedyrat Sámedikkiin ja šállobuhtadusortnet sámiide ja kveanaide geat masse skuvlavázzima nuppi máilmmisoađi dihte, dadjá gielda- ja guovloministtar Erna Solberg.

-Finnmárkkuláhka, mainna lei bargojuvvon 25 jagi, dohkkehuvvui loahpalaččat geassemánu 17.beaivvi. Mun doaivvun dát láhka buktá buori ovdáneami buohkaide geat orrot fylkkas, dadjá Erna Solberg.

Ráđđehusa stáhtabušeahttaevttohusas lea várrejuvvon 1,6 miljovnna kruvnno diehtojuohkimii lága birra jagis 2006. Seamma stuoru ruhtasumma dán bargui lea várrejuvvon Gielda- ja guovlodepartemeantta bušeahtas jagis 2005. Finnmárkkuopmodaga stivra galgá leat ásahuvvon ođđajagimánu 1.b. 2006. Ráđđehus evttoha jagis 2006 juolludit 5 miljovnna kruvnno ásahanloana Finnmárkkuopmodahkii.

-Sámediggi lea dehálaš eaktobiddji ja gulahallanguoibmi sámepolitihkas. Danne lea dehálaš bivdit Sámedikkis rávvagiid buot áššiin mat leat dehálaččat sámiide, dadjá gieldaministtar. 2005 ’giđa soabaiga gieldaministtar ja sámediggepresideanta ráđđádallanprosedyraid stáhtalaš eiseválddiid ja Sámedikki gaskii. Vai dáid galgá sáhttit čuovvolit dohkálaš vugiin, de lea áibbas dárbbašlaš ahte almmolaš hálddašeaddjit ja sámi servodat ožžot buriid dieđuid ráđđádallanprosedyraid sisdoalu birra ja movt daid galgá čuovvolit geavatlaččat. Leat hutkojuvvon diehtojuohkindoaimmat ráđđádallanprosedyraid birra jagis 2006.

Sámiide, geat masse skuvlavázzima nuppi máilmmisoađi dihte, ja geat maid eai ožžon oahpahusa iežaset eatnigillii dáruiduhttima dihte, leat dat joavku geaidda dát lea čuohcan unohasat. Ráđđehus evttohage dan dihte stuoradiggedieđáhusas St. meld. nr. 44 (2003-2004) Buhtadusortnegat soahtemánáide ja buhtadusortnegat romaniálbmogii/táhteriidda ja boarraset oahppováillat sápmelaččaide ja kveanaide, heivehit šállobuhtadusortnega vai dát joavku sáhttá oažžut buhtadusa. Stuoradiggi guorrasii Ráđđehusa evttohussii cuoŋománus 2005. Dás lea deattuhuvvon ahte galgá leat álki ohcat buhtadusa, almmá ilá olu báberlána haga.

Ráđđehus lea vuoruhan láhčit dili vai sámegiella eambbo geavahuvvo almmolašvuođas.
– Ráđđehus lea dán čuovvolahttán earret eará go lea álggahan ásahit davviriikkalaš Gollegiella- giellabálkášumi, ollasii ruhtadit guovttegielalašvuođa olggosgoluid suohkaniin mat gullet sámegiela hálddašanguovlui, lasihan jahkásaš preassadoarjaga sámi aviissaide, lágidan sámegiela IT-oktavuođas, ja ásahan sámegiela válljenvejolašvuohtan departemeatta neahttasiidduin, dadjá Erna Solberg.

Ráđđehusas lea sámi oahpahus ja dutkan okta deháleamos nannensurggiin. –Danne lean mun hui duhtavaš go Ovttasbargoráđđehus su bušeahttaevttohusas jahkái 2006 evttoha 10 miljovnna kruvnno álgaruhtan ođđa dieđavissui Guovdageidnui. Go dieđaviessu lea gárvanan, de dat lea okta dain deháleamos deaivvadansajiin sámi oahpahusas ja dutkamis, dadjá Erna Solberg.

Ráđđehus lea máŋgga suorggis láhčán dili sámi ealáhusaide. Go ásaheimmet guokte boazodoalloguovddáža, nappo Riikkaidgaskasaš boazodoallofága- ja gaskkustanguovddáš ja Luondo- ja boazodoallobálvalusaid ressursaguovddáš, de ráđđehus lea hálidan ovddidit bálvalusaid ja máhtolašvuođa boazodoalu vuođul, mii lea okta dain deháleamos ealáhusain sámi kultuvrras.

Ráđđehus lea sakka deattuhan diehtojuohkima almmolašvuhtii sámi áššiid birra, ja doaimmaid mat buktet oidnosii sámivuođa almmolašvuođas, vai njeaida ovdagáttuid ja unohas miellaguottuid.

Finnmárkuláhka

Ovttasbargoráđđehusa sámepolitihkka

Gielda- ja guovlodepartemeantta preassatelefovdna: 22 24 25 00.