Johtočálus Sámediggeválggaid láhkaásahusa rievdadusaid birra

Sámediggi
Gielddat válgastivrraid ja sámeválgastivrraid bokte
Fylkkagielddat fylkkaválgastivrraid bokte
Fylkkamánnit
Politihkalaš bellodagat
Sámepolitihkalaš organisašuvnnat (PDF)

 

Johtočálus Sámediggeválggaid láhkaásahusa rievdadusaid birra – Gielddat galget 2011 rájes bidjat ovdan Sámedikki jienastuslogu almmolaš dárkkisteapmái juohke válgajagi

Ođđa láhkaásahus Sámediggeválggaid birra nr. 1480 dohkkehuvvui gonagaslaš resolušuvnna bokte juovlamánu 19.b. 2008, sámelága vuođul maid Stuoradiggi 1988:s dohkkehii. Jagi 2009 sámediggeválggaid rájes gusto ođđa válgabiirejuogus mas válgabiriid lohku lea unnon 13 válgabires 7 válgabirii, ja dan rájes earuhit daid gielddaid gos leat golbmalogis dahje eanebut Sámedikki jienastuslogus dain gielddain gos leat unnit go golbmalogis logahallojuvvon jienastuslohkui. Daid gielddaid jienasteaddjit gos leat unnit go golbmalogis jienastuslogus, sáhttet sámediggeválggas dušše jienastit ovdalgihtii.

Gonagaslaš resolušuvnna bokte miessemánu 6.b. 2011 dohkkehuvvojedje ođđa láhkaásahusrievdadusat Sámediggeválggaide. Mearribeaivi biiriid mandáhtajuogu mearrideami hárrái ja goas earuhit gielddaid gos leat unnit go golbmalogis jienastuslogus, lea rievdaduvvon nu ahte dál lea geassemánu 30.b. gielddastivrraid ja fylkkadikkiid válgajagi.

Láhkaásahusa sámediggeválgga birra nr. 1480 gávnnat www.lovdata.no siiddus. Dán johtočállosa gávnnat dárogillii ja sámegillii, ja láhkaásahusa sámegillii Ođasmahttin-, hálddahus ja girkodepartemeantta neahttasiidduin.
Dokumeanttat gávdnojit maiddái Sámedikki neahttasiidduin: www.samediggi.no

Váikkuhusat gielddaide
Láhkaásahusrievdadusat eaktudit ahte gielddat almmuhit ja bidjet ovdan Sámedikki jienastuslogu almmolaš dárkkisteapmái juohke válgajagi, namalassii sihke dan jagi go lea gielddastivrii ja fylkkadiggái válga, ja dan jagi go lea sámediggeválga. 2011 rájes galget gielddat almmuhit ja bidjat ovdan Sámedikki jienastuslogu almmolaš dárkkisteapmái juohke válgajagi.

Sámediggi galgá ráhkadit válgajienastuslogu ja fuolahit ahte gielddain lea ođastuvvon jienastuslohku go almmuhit ja bidjet dan ovdan almmolaš dárkkisteapmái. Jienastuslohkočállosiid lea Sámediggi diŋgon, ja Ergo sádde daid alit ivnnis gielddaide.

Departemeanta bivdá gielddaid árvvoštallat guđe vuogi mielde Sámedikki jienastuslohku galgá almmuhuvvot. Dan sáhttá dahkat máŋgga láhkái, ovdamearkka dihte:

• Go gielddat almmuhit ahte gieldda- ja fylkkadiggeválggaid jienastuslohku lea ovdanbiddjon almmolaš dárkkisteapmái, de sáhttá seamma almmuhusas dieđihit ahte maiddái Sámedikki válgajienastuslohku lea biddjon ovdan almmolaš dárkkisteapmái.
• Nubbe vuohki sáhttá leat ahte gielddat almmuhit dán guokte válgajienastuslogu ovdanbidjama oktanis, muhto ii seamma almmuhusas. 
• Dain gielddain gos dat orru govttolaččamus, sáhttá almmuhit njuolgga dieđuin juohkehažžii gii lea čálihuvvon  jienastuslohkui.
• Almmuhit ii dárbbaš jus gielddas eai leat registrerejuvvon olbmot Sámedikki jienastuslogus.

Gulaskuddamis lea boahtán ovdan ahte evttohuvvon rievdadusat eai dagat mearkkašahtti hálddahuslaš váikkuhusaid, eai ge mearkkašahtti lassigoluid. Departemeanta eaktuda ahte jus ležžet lassigolut almmuheami oktavuođas, de dat meannuduvvojit seammaládje go gielddastivrra- ja fylkkadiggeválggaid oktavuođas.

Rievdadusat juovlamánu 19.b. 2008 nr. 1480 láhkaásahussii Sámedikki válggaid birra
Láhkaásahusrievdadusat mearriduvvojedje gonagaslaš resolušuvnna bokte miessemánu 6.b. 2011. Rievdadusat bohte fápmui seamma beaivvi. Guoskevaš mearrádusaid rievdadusat leat dás kursivan:

§ 4 nubbe lađas čuodjá:
     
         Jienastuslohku ráhkaduvvo daid jagiid, go leat sámediggeválggat ja válggat gielddastivrii ja fylkkadiggái. Vuođusin geavahuvvo gieldda álbmotregisttar, maŋimus válgga jienastuslohku ja dat ohcamušat čálihuvvat jienastuslohkui dahje sihkkojuvvot jienastuslogus, mat leat boahtán maŋimustá válgajagi geassemánu 30. b. Álbmotregisttareiseválddis lea ovddasvástádus fuolahit ahte Sámediggi oažžu daid álbmotregisttardieđuid maid dat dárbbaša jienastuslogu gárvvisteapmái.

§ 8 vuosttaš lađas čuodjá:

         Sámeválgastivra galgá fuolahit ahte Sámedikki jienastuslohku lágiduvvo almmolaš dárkkisteapmái jođáneamos lági mielde. Jienastuslogu galgá sáhttit dárkkistit gitta válgabeaivvi olggos dan jagi go lea sámediggeválga ja dan jagi go leat válggat gielddastivrii ja fylkkadiggái.

§ 39a čuodjá:

         Jienasteaddjit guđet leat logahallojuvvon dakkár gieldda jienastuslohkui, main leat unnit go golbmalogis logahallojuvvon jienastuslohkui, sáhttet dušše jienastit ovddalgihtii, gč. sámelága § 2-3. Mearridan dihtii guđemuš gielddaide dat guoská, galgá Sámedikki jienastuslohku geassemánu. 30.b. dan jagi go maŋemus dollojuvvui gielddastivrra- ja fylkkadiggeválga adnojuvvot vuođđun. 

§ 47 nubbe lađas čuodjá:

        Dakkár gielddain main leat unnit go golbmalogis jienastuslogus, vrd. § 39a, ii leat vejolaš jienastit sámediggeválgii válgabeaivvi.

§ 67 njealját lađas čuodjá: 

        Ođasmahttin-, hálddahus- ja girkodepartemeanta  mearrida lávadagaid, maid mielde galgá beavdegirjet hálddahuslaš dilálašvuođaid, jietnaaddimiid ja jienastanlihpuid vuostáváldima ja gieđahallama, lohkama, válgaloahpparehkenastima ja dárkkisteami.

§ 67a vuosttaš lađas čuodjá: 

          Mandáhtat juogaduvvojit válgabiiriide St. Laguë heivehuvvon vuogi mielde, gč. sámelága § 2-4. Buot Sámedikki 39 áirasa galget juogaduvvot válgabiirriide.Válgabiirre juogadanlohku mandáhtaid juogadeamis válgabiirriid gaskkas lea daid olbmuid lohku geat leat čálihuvvan válgabiirre jienastuslohkui. Sámedikki jienastuslohku geassemánu 30.b. dan jagi go maŋemus lei gielddastivra- ja fylkkadiggeválga adnojuvvo vuođđun.

 

Dearvuođaiguin

 

Petter Drefvelin ekspedišuvdnahoavda

Máret Guhttor  ossodatdirektora