H-18/04 - Sámelága rievadeamit - Sámediggi lea váldán badjelasas ovddasvástádusa girjet sámi jienastuslogu

Gielddat
Fylkkagielddat
Sámediggi
Vearrodirektoráhta – Álbmotregistrerema guovddáškantuvra
Sámi organisašuvnnat
2001 sámediggeválgga válgalisttat

Sámelága rievadeamit – Sámediggi lea váldán badjelasas ovddasvástádusa girjet sámi jienastuslogu

Álggaheapmi
Stuorradiggi mearridii njukčamánu 30. b. 2004 rievdadit geassemánu 12. b. 1987-mannosaš lága nr. 56 Sámedikki ja eará sámi riektediliid birra (sámelága). Mearrádus guoská rievdadusaide sámelága paragráfii 2-6 Sámi jienastuslohku, mat leat dahkkojuvvon Ot.prp. nr. 26 (2002-2003) vuođul ja Stuorradikki gielddalávdegotti Innst. O. nr. 53 (2003-2004) vuođul.

Láhkarievdadus gustogođii miessemánu 14. b. 2004.

Sámediggi girje ollásit sámi jienastuslogu
Sámelága paragráfii 2-6 lea lasihuvvon ođđa nubbi lađas, mii čuodjá ná: ”Ohcan čálihuvvat sámi jienastuslohkui sáddejuvvo Sámediggái”. Seamma mearrádusas lea aiddostahttojuvvon ahte ”Sámi jienastuslohku galgá girjejuvvot gielddaid mielde”.

Láhkarievdadus mielddisbuktá ahte Sámediggi lea váldán badjelasas olbmuid ássangielddaid ovddasvástádusa čálihit olbmuid sámi jienastuslohkui ja das sihkkut olbmuid daid ohcamušaid vuođul, maid dat oažžu. Sámedikkis lea ovddasvástádus olles jienastuslogu girjemis ja das ahte jienastuslohku girjejuvvo gielddaid mielde.

Ohcamušat galget dađistaga sáddejuvvot Sámediggái
Láhkarievdadus mielddisbuktá dan ge ahte ovddasvástádus dohkkehit čálihanohcamušaid ja

-sihkkumiid sirdojuvvo gielddain Sámediggái. Ohcamušat čálihuvvat sámi jienastuslohkui sáddejuvvojit Sámediggái. Gielddat, mat ožžot ohcamušaid, galget fuolahit ahte dát dađistaga sáddejuvvojit Sámediggái.

Juohke gieldda válgajienastuslohku
Sámediggi áigu, ovttas Álbmotregistrerema guovddáškantuvrrain, čađahit čálihemiid guovddáš álbmotregistarii ja fuolahit ahte gielddat ožžot ođastuvvon válgajienastuslogu sámediggeválgii. Áigemearri ohcat čálihuvvama sámi jienastuslohkui lea sámeválgaláhkaásahusas evttohuvvon biddjojuvvot miessemánu 31. beaivái.

Lagat njuolggadusat sámi jienastuslogu bidjama birra almmolaš geahčadeapmái, divvunvejolašvuođa birra ja rievdadandieđiheami birra, galget nu mo ovdal mearriduvvot sámediggeválgga láhkaásahusas sámelága § 2-11 vuođul. Mii čujuhit dán oktavuođas sámediggeválgga láhkaásahusa álgodivodussii, mii dál lea gulaskuddamis. Láhkaásahusa álgodivodusas árvaluvvo ahte sámi jienastuslogu galgá sáhttit ođastit nu guhká go lea geavatlaččat vejolaš gitta válgabeaivái.

Departemeanta aiddostahttá ahte Sámedikkis dat lea ovddasvástádus čađahit divvumiid sámi jienastuslogus ja/dahje čálihemiid sámi jienastuslohkui, ja doaimmahit ođastuvvon sámi jienastusloguid gielddaide. Gielddain ii leat miige ovddasvástádusaid das mii guoská sámi jienastuslogu ođasteapmái válgabeaivvi rádjai.

Eará rievdadeamit
Sámediggái lea maiddái dáinna láhkarievdademiin sirdojuvvon departemeantta ovddeš váldi diktit earáid geavahit sámi jienastuslogu, earret eará dutkanulbmiliidda.

Sámelága dievaslaš teavstta gávnnat Lovdata-nammasaš čujuhusas: www.lovdata.no

Dearvvuođaiguin

Drefvelin Petter (fápmudusa vuođul)
ekspedišuvdnahoavda

Máret Guhttor ossodatdirektevra