Addet eaktodáhtolaš organisašuvnnaide reaidduid ja beassama Heahtenehttii

Suoidnemánu 22.beaivvi vásáhusat čájehit ahte eaktodáhtolaš organisašuvnnain lea guovddáš rolla gádjunakšuvnnain. Danin ráđđehus fuolaha ahte  eaktodáhtolaččat dál ožžot reaidduid ja beassama Heahtenehttii.

– Eaktodáhtolaččain lea guovddáš rolla ja integrerejuvvon rolla gádjunbálvalusas ja sii leat lunddolaš Heahteneahta geavaheaddjit. Máŋgga oktavuođas leat eaktodáhtolaččat áidna olámuttos resurssat fáhkkatlašmuttus, lohká justis- ja gearggusvuođaministtar Grete Faremo.  

Ráđđehus danin dál fuolaha ahte eaktodáhtolaš organisašuvnnat sáhttet šaddet ollislaš geavaheaddjin heahteossodaga ođđa, giddejuvvon oktavuođavuogádagas.

Máŋga eaktodáhtolaš organisašuvnnas lea leamaš vejolašvuohta geahččalit heahteneahta vuosttaš huksenceahkis guovddáš Østlánda- guovllus. Leat leamaš positiivvalaš ruovttoluottadieđut.  

Heahterusttet geigen gádjunbálvalusa eaktodáhtolaš oasseváldiide dáhpáhuvvá guovtti lávkkis: Álggos ožžot Røde Kors Hjelpekorps, Norsk Folkehjelp, Norske Redningshunder ja Redningsselskapets Sjøredningskorps dakkaviđe ja bistevaččat daid heahteneahttadávviriid maid ledje luoikkas ožžon. Lea sáhka sullii 140 mátkerádios vuosttaš huksenceahkis.

Dasto áigu Heahtekommunikašuvnna direktoráhtta (DNK) álggahit proseassa mas háhket eambbo heahteneahttarádioid maid juhket eaktodáhtolaš organisašuvnnaide mat oassálastet gádjunbálvalusas muđui riikkas. 

Ráđđehus evttoha ahte stáhta gokčá geavaheaddjidávviriid vuosttašgearddeinvesterema, doaibmagoluid ja diŋgondivada mii oktiibuot dahká 5,2 milj. ruvnno 2013:s. Go Heahteneahta gokčá olles riikka, de leat ollislaš golut Heahteneahta sisafievrredeamis eaktodáhtolaččaide meroštallojuvvon máksit 51,7 mill. ru. Dákko bokte čuovvola ráđđehus Stuoradikki mearrádusa das ahte gádjunbálvalusa eaktodáhtolaš organisašuvnnat galge maŋit áigemuttus beassat geavahišgoahtit Heahteneahta, gč. Evttoh. 371 S (2010–2011).