Čavgadeabbo njuolggadusat maid mielde muddet bombakemikálaid

Bargojoavku árvala máŋga doaibmabiju mat galget váttásmahttit vuovdimis kemikálaid mat geavahuvvojit ruovtturáhkaduvvon bombbaide. Ulbmil lea hehttet terrorfallehemiid boahtteáiggis.

Bargojoavku, maid DSB lea jođihan, ásahuvvui Justiisa- ja gearggusvuođadepartemeantta dáhtu mielde guovvamánus 2012. Departemeanta lea dál ožžon bargojoavkku raportta.

-Mun áiggun hui dárkilit guorahallat raportta ja árvvoštallat bastileabbo njuolggadusaid ja bearráigeahču bombakemikálaid geavaheapmái. Mis lea dál buorre vuođđu árvvoštallat beavttálmahtti doaimmaid dán suorggis ovttas raporttain Njuolggadusat maid mielde muddet ja bearráigeahččat ammoniumnitráhta gávppašeami, cealká Justiisa- ja gearggusvuođaministtar Grete Faremo.

EO lea árvalan čavget 15 iešguđetlágan bávkalanávdnasiid ja ávnnasseaguhusaid vuovdima, maid lea vejolaš geavahit ruovtturáhkaduvvon bombbaide. Árvalusa áigumuš lea ahte hehttet dábálaš olbmuid gávppašeames dákkár kemikálaid. Bargojoavku lea árvvoštallan makkár váikkuhusaid EO árvaluvvon njuolggadusat mielddisbuktet ja árvala dárbbašlaš doaibmabijuid.

Árvaluvvon doaibmabijuid ulbmil lea buoridit servodaga gohccevašvuođa, gáržžidit vejolašvuođaid gávppašit dákkár ávdnasiid lobihis daguide ja čađaheames sávakeahtes iešdáhtolaš fallehemiid, maiddái terrorbávkalemiid plánenbarggu ja čađaheami.

Vuostáiváldojuvvon raporta árvvoštallojuvvo oktan daid doaibmabijuiguin mat leat árvaluvvon raporttas Njuolggadusat maid mielde muddet ja bearráigeahččat ammoniumnitráhta gávppašeami, mii geigejuvvui departementii geassemánus 2012.