Sárdni Ráđđeviessošilju muitokonsearttas

Gonagaslaš allavuohta,
Ráhkis buohkat,

Lea nu buorre fas din oaidnit!

Jagi maŋŋel mii fas dan dahkat:
Deavdit gáhtaid.
Dorvvolašvuođas nubbi nubbái ja min rabas servodahkii.

Mii sáhtiimet válljet.
Mii sáhtiimet giddet iežamet balu uvssaid duohkái.
Cegget eahpeluohttámuša áiddiid.

Mii baicca rahpaseimmet ja huksiimet luohttámuša šalddiid.

Dat lei min báifáhkka vástádus diimmá veahkaválddálašvuhtii.
Mii válljiimet riekta.

Máilmmis ii gávdno buoret suodji terrora vuostá go rabasvuohta, demokratiija ja olmmošvuohta.

Dat ii daga min fallemeahttumin.

Mii dárbbašit politiija ja dárkkistemiid.
Dávviriid, stargatvuođa ja dáhtu hehttet sin geat háliidit geavahit veahkaválddálašvuođa.

#

Liikká.
Álbmoga dagut maŋemus jagi leat dehálepmosat.

Luohttámuš servodagas, jáhkku demokratiijii lassána.

• Duháhiid mielde leat dieđihan searvevuođa bálvalussii eaktodáhtolaš organisašuvnnaide ja politihkalaš bellodagaide.
• Ja eambbogat vuosttildišgohtet vaššilágan cealkámušaid.
• Máŋga čuohteduhát olbmo leat vásihan nannodaga oktiisearvamis, ja das ahte doarjut min árvvuid. 

Nu mii leat ásahan eambbo demokratiija ja eambbo rabasvuođa.

#

Odne lea áigi giitit buohkaid geat dan lossa jagis leat veahkehan.

Majestehta Gonagas, gii čierui iežas álbmogiin.
Visot gonagaslaš bearaš, mii searvvai ollásit dalle go eanemusat dárbbašeimmet dan.

#

Lea áigi giitit eaktodáhtolaččaid.
Gádjunveagaid ja heahteetáhtaid.

Din nuoraid geat lehpet váldán vára nubbi nuppis.
Departemeanttaid bargiid.

Buohkaid din geat lehpet hálddašan diggeášši gelbbolaš miellaguottuin ja miellamášuin.

Dat leat hirbmat ollugat:
oahpaheaddjit,
dearvvašvuođabargit
báhpat,
imámat,

Dii geat lehpet veahkehan ránná, bargoustiba, olbmá dahje fuolkki.

Buohkaid árjjat oktiibuot dahket ahte mii sáhttit doaivagiin ja jáhkuin geahčestit ovddasguvlui.

Doaivagiin ahte sii geat ain gillájit galget oažžut jeđđehusa.
Jáhkku ovttasdoaibmamii, gierdevašvuhtii ja šigolašvuhtii.

#

Olles beaivvi, ja miehtá riikka leat mii muittašan dan 77 geat gottáhalle.

Dat lea leamašan lossat, muhto maiddái buorre.
Buorre go mii leat lohpidan muitit daid nieguid mat sis ledje.
Muitalit daid liekkus historjjáid.

Suoidnemánu 22.b galgá boahtteáiggis álohii leat sin beaivi.
Beaivi goas mii muittašit sin geat jápme.
Ja beaivi goas mii jurddašit eallima birra.

#

Vearredagut diibmá oainnusindahke man mávssolaš eallin lea.

Fáhkka dat sáhttá leat nohkan.
Ii oktage mis dieđe goas.
Ii oktage mis dieđe gii.

Galgá čájehit ráhkisvuođa ja fuola dan bále go mis lea eallin skeaŋkan.

Návddašit lieđi čábbodaga.
Hearkkes šuoŋa musihkas.
Olbmáid liekkusvuođa.

#

Ilolašvuođain eallima ovddas mii gudnejahttit sin geat leat jápmán.