Karmel-Instituhtta čuldojuvvo skeaŋkageasusortnegis

Karmel-Instituhtta čuldojuvvo skeaŋkageasusortnegis ođđaseamos dieđuid vuođul ahte ruhtadoarjagat addojuvvojit Israel-ássamiidda vuollástuvvon (okkuperejuvvon) guovlluin.

-Mii háliidat garvit ahte skeaŋkageasusortnet geavahuvvo doarjut organisašuvnnaid mat aktiivvalaččat dorjot dahje leat mielde váikkuheamen doaimmaide mat rihkkot álbmotrivttiid. Danne ásaheimmet čuoldinortnega. Karmel-Instituhta jagi 2012 ruhtajuolludemiid ođđaseamos dieđuid vuođul lea departemeanta mearridan čuoldit vuođđudusa skeaŋkageasusortnegis, cealká stáhtačálli Roger Schjerva.

Vearromáksit ožžot jahkásaččat boahtogessosa 12 000 kruvnnu rádjái ruhtaskeaŋkkaid ovddas maid addet eaktodáhtolaš organisašuvnnaide mat devdet láhkamearriduvvon eavttuid. Ruhtadandepartemeanta sáhttá boahtojagi 2012 rájes čuoldit organisašuvnnaid skeaŋkageasusortnegis sihkkarastin dihtii ahte Norga čuovvu ON sihkkarvuođaráđi mearrádusaid. Karmel-Instituhtta lea ovdal juolludan ekonomalaš doarjagiid Israel-ássamiidda vuollástuvvon guovlluin. Departemeanta mearridii borgemánus ollislaš árvvoštallama vuođul ahte ii čuoldde Karmel-Instituhta skeaŋkageasusortnegis earret eará daid dieđuid mielde maid vuođđudus ieš attii ahte sii eai lean šat juolludan ruđaid ássamiidda maŋŋá go ođđa regelat fápmuduvvojedje. Seammás čuvgejuvvui Karmel-Instituhttii ahte jos ruhtajuolludeamit ássamiidda joatkašuvvet jagi 2012 dahje maŋŋil, de dat mielddisbuktá čuoldima.

Ruhtadandepartemeanta lea dál ožžon ođđa dieđuid vuođđudusa doaimmaid birra, ja oaivvilda ahte dat addet vuođu čuoldit Karmel-Instituhta skeaŋkageasusortnegis. Mearrádus ákkastuvvo ahte vuođđudus lea jagi 2012 joatkán dábiidis juolludit ruhtaaddosiid ássamiidda. Muhtun mátkis maid Karmel-Instituhtta lágidii giđđat 2012 Alonei Shilo:ii geigii Karmel-Instituhta stivraovdaolmmoš ruhtasupmi dán ássanbáikái. Departemeanta ii váldde vuhtii dan maid vuođđudus čuoččuha ahte stivraovdaolmmoš geigii ruhtasupmi priváhta olmmožin muhtun priváhta olbmo ovddas, dan sivas go vuođđudusa stivraovdaolmmoš ja beaivválaš jođiheaddji dán oktavuođas identifiserejuvvo Karmel-Instituhtain. Dasa lassin celkkii stivraovdaolmmoš Fædrelandsvennen aviisii borgemánu 17.beaivve 2012 ahte son ii leat lohpidan iige sáhte lohpidit heaitit doarjumis ássamiid.