5,6 miljárdda kruvnno gielddaid ovttasdoaibmamii

Gielddat ožžot badjel 5,6 miljárdda kruvnno 2012 go ođđa ovttasdoaibmanođastus álggahuvvo. – Dan láhkai gielddat ožžot návccaid čađahit ođđa doaimmaid, maid sii ožžot ođastusa olis, gielda- ja guovluministtar Liv Signe Navarsete dadjala.

2012 rájes gielddat leat mielde ruhtadeamen spesialistadearvvašvuođabálvalusa ja gielddain lea máksinovddasvástádus daid buhcciid guovdu, geat leat gergosat beassat ruoktot buohcceviesuin. Dat leat ođđa doaimmat gielddaide, ja danin juolluditge 5,6 miljárdda ovttasdoaibmamii dan lassin, maid gielddat ožžot boahtolassáneapmin boahtte jagi.

– Riikka gielddat leat álggahan ovttasdoaibmanođastusa doaimmaid buori áiggis ovdalgo ođastus lea fámus. Boahtte jagiid vuohttigoahtit rievdadusaid, maid mielde ássit ožžot eanet ja buoret dearvvašvuođabálvalusaid lagabus iežaset ássanbáikki, Navarsete muitala.

- Ovttasdoaibmanođastusain mii čájehit luohttámuša gielddaide. Ođastus lea fámus jahkemolsašumi rájes, muhto rievdadusat dahkkojuvvojit áiggi mielde. Gielddat gerget heivehit iežaset ođđa doaimmaide, ja besset dan láhkai gávnnahit buoremus čovdosiid ássiidasaset. Jáhkán nannosit, ahte gielddat gávdnet iehčanassii dahje ovttasbarggus ránnjágielddaiguin buriid čovdosiid ássiid ovdun, Navarsete cealká.

Ruđat, maid gielddaide juolludit spesialistadearvvašvuođabálvalusa oasseruhtadeapmái ja gielddaid máksinovddasvástádussii daid buhcciid guovdu, geat leat gergosat beassat ruoktot buohcceviesuin, juogáduvvojit gielddaide boahtovuogádaga mielde, mii čuovvu ássiid ahkečohkiidusa.

Oktiibuot juolluduvvo doarvái ruhta gokčat gielddaid goluid oasseruhtadeamis ja daid buhcciin, geat leat gergosat beassat ruoktot buohcceviesuin.

- Dattetge sáhttet muhtin gielddain leat eanet golut ortnega álggahettiin, go maid ruđaid juogadanortnet čájeha. Dat ožžot golmma jagi áigge buhtadusa dan lassin, mii juolluduvvo juogadanortnega mielde, Navarsete dadjala.

Ráđđehus fuolaha das, ahte oktage gielda ii galgga táhpet nuppástuhttimis, ja bidjá danin 305 miljovnna kruvnno friddja boađuid lassáneamis buhtadussan ovttaskas gielddaide boahtte jagi.

2016 rájes gielddain lea geatnegasvuohta fállat jándordivššu olbmuide, geat dárbbašit fáhkkaveahki gieldda dearvvašvuođa- ja fuolahanbálvalusas. Gielddat ožžot 262 miljovnna ruđa barggu álggaheapmái jo 2012. Bealli ruđain juhkkojuvvo ohcama vuođul ja bealli juolluduvvo njuolggodoarjjan guovlluid dearvvašvuođafitnodagaid bokte. Ruhta juolluduvvo dan 5,6 miljárdda lassin, mii juolluduvvo rámmadoarjjan.

Gielda- ja guovludepartemeantta preassatelefovdna: 22 24 25 00.