40 miljovnna kruvnno ođđa ealáhusgárdeprográmmii

Ráđđehus árvala juolludit 40 miljovnna kruvnno ođđa ealáhusgárdeprográmmii SIVA olis.

SIVA lea álggahan ođđa ealáhusgárdeprográmma. Gielda- ja guovlodepartemeanta árvala juolludit 40 miljovnna kruvnno ođđa prográmmii 2012. Dat lea guokte gearddi nu ollu go 2010 bušeahtas. Prográmmain áigot ovddidit ođđa bargosajiid boaittobeale guovlluid ealáhusaide, main ovddidit máhtu doaimmaid olis. Áigumuš lea láhčit dilálašvuođaid máhttobargosajiide dálá ealáhusaid olis ja ođđa fitnodagaid álggahemiin.

- Ealáhusgárdeprográmma lea mávssolaš danin go mun jáhkán, ahte go smávva fitnodagat leat ovtta sajis fágaidgaskasaš birrasis, de dat movttiidahttá hutkáivuhtii ja nanuvuhtii. Evalueremiin lea boahtán ovdan, ahte dat lea ovddidan fitnodagaid, mat leat jo doaimmas. Dakkár birrasiin bohciidit ođđa jurdagat ja ođđa fitnodagat, gielda- ja guovloministtar Liv Signe Navarsete dadjala.

Ealáhusgárdi lea ovddidan- ja ođđahutkanbiras fitnodagaide, mat sierra searvvi olis háliidit ovddidit máhttobargosajiid guvlui. Prográmmii beassan eaktuda, ahte álggaheami áigge mielde leat unnimusat vihtta fitnodaga, mat leat jo doaimmas dahje maid leat ásaheamen, ja ahte dain leat oktiibuot 10 bargi.

Ealáhusgárdebirrasa galgá ásahit lagaš ovttasbarggus fylkkagielddaiguin, ja das galgá váldit vuhtii guovllu dárbbuid ja hástalusaid.

Gielda- ja guovlodepartemeantta preassatelefovdna: 22 24 25 00.