21,2 miljovnna mohtorboaldámuša doaimmaheapmái guovlluide

Ráđđehus juolluda oktiibuot 47,2 miljovnna kruvnno MERKUR-prográmmii ja guovlluid gávppiid ovddidan- ja investerendoarjjan. 21,2 miljovnna lassánemiin áigot nannet mohtorboaldámuša doaimmaheami guovlluide. Mohtorboaldámuša fidnen lea mávssolaš go leat guhkes gaskkat.

- Dáinna nannet čielgasit barggu, maid MERKUR dahká dan ovdii, ahte guovlluin livčče olámuttos buoret bálvalusat. Oasi ruđain geavahit maid dasa, ahte ovddidit ođđa plánaid mo borramušgávppit sáhttet nannet sajádagaset bálvalusaid mávssolaš fállin boaittobealeguovlluin, gielda- ja guovloministtar Liv Signe Navarsete dadjala.
 
MERKUR-prográmma lea gelbbolašvuođa- ja ovddidanprográmma, mii bargá guovlluid borramušgávppiid ovdii. MERKUR-áŋgiruššama vásáhusat leat buorit. MERKUR:in merkejuvvon gávppiid jođihit muhtin muddui marginála eavttuiguin, muhto dat cevzet máŋgii buorebut go eará guovllugávppit. Dáid buriid bohtosiid geažil MERKUR lea viiddidan bargosuorggis.

Maŋimuš jagiid leat ovddidan sierra fálaldaga guovlluid girjegávppiide, leat ásahan borramušgávppiide sierra investeren- ja ovddidandoarjaga, nu ahte gávppit sáhttet ođasmahttit ja investeret gávpái (dihtorat ja čoaskudanrusttegat) ja 2012 viiddiduvvo de investeren- ja ovddidandoarjja, nu ahte sáhttit nannet mohtorboaldámuša fidnema guovlluin. Doarjjaortnegiin sáhttet ođasmahttit mohtorboaldámušrusttegiid, mat leat jo doaimmas, ja šaddá vejolaš investeret ođđa johtti rusttegiidda.

Dan lassin álggahuvvo maid geahččalanprošeakta, mas muhtin gávppit geahččalit fállat gávppi sosiála arenan ássiide.

- Dieđán, ahte lagaš gávpi lea mávssolaš ollu báikkálaš servodagaide. Eat galgga unnášit gávppi mearkkašumi deaivvadansadjin ja bálvalusaid fállin, dat lea dego gili váibmu, gielda- ja guovloministtar Liv Signe Navarsete dadjala.

Gielda- ja guovludepartemeantta preassatelefovdna: 22 24 25 00.