13 miljovnna Ungt entreprenørskap -searvái

2012 stáhtabušeahta árvalusastis Gielda- ja guovlodepartemeanta lasiha Ungt entreprenørskap -searvvi doarjaga 2 miljovnnain kruvnnuin, nu ahte doarjja šaddá oktiibuot 13 miljovnna kruvnno. 

Doarjagiin searvi galgá bargat nannosit entreprenevravuođa kultuvrra huksemiin. Dasa lassin juolludit vel miljovnna kruvnno lasi davviguovlluid nuoraid entreprenevravuhtii Innovasjon Noreg bokte. 

Gielda- ja guovlodepartemeanta (GGD) juolluda bušeahtastis nappo oktiibuot 13 miljovnna kruvnno Ungt Entreprenørskap -searvái, ja GGD lea de UE stuorámus doarjjaaddi.  

- Mu mielas lea mávssolaš, ahte olles riikkas leat valjis sierralágan bargosajit. Dat eaktuda, ahte mis leat ollugat, geat áŋgirvuođain ja vuollánkeahtesvuođain álggahit iežaset fitnodagaid. Mun lean hirpmástuvvan man ollu beroštumi, hutkáivuođa ja roahkkatvuođa Ungt Entreprenørskap lea mielde bohciidahttimin nuorra hutkiin, gielda- ja guovloministtar Liv Signe Navarsete dadjala.  

Ungt Entreprenørskap bargá aktiivvalaččat ovttas skuvllaiguin ja oahppoásahusaiguin, ja lea mielde addimin ohppiide ja studeanttaide fálaldaga, man olis sii ohppet entreprenevravuođas. Doaimmat leat viidon sakka dan rájes go organisašuvdna ásahuvvui 1997. 2010 serve badjel 150 000 oahppi ja studeantta UE doaimmaide. 67 proseantta buot Norgga joatkkaskuvllain fállet nuoraidfitnodaga.  

Ráđđehus lasiha maid Ealáhus- ja gávpedepartemeantta doarjaga Ungt Entreprenørskap ‑searvái 1 miljovnnain kruvnnuin, nu ahte doarjja šaddá 12 miljovnna kruvnno.  

Ráđđehus árvala maid lasihit Davvi-Norgga nuoraid entreprenevravuođa- ja ođđahutkama doarjaga Innovasjon Noreg bokte. Doarjja, mii juolluduvvo Gielda- ja guovlodepartemeantta bušeahtas, lasihuvvo 1 miljovnnain kruvnnuin, ja šaddá 5 miljovnna kruvnno.  

Gielda- ja guovludepartemeantta preassatelefovdna: 22 24 25 00.