Evttohit 867 miljovnna nannet gearggusvuođa

– Norga lea dalle buoremus láhkai ráhkkanan dustet terrorfallehemiid ja duođalaš vearredaguid. Dát lea beaktilis gearggusvuođabušeahtta, dadjá justiisa- ja gearggusvuođaministtar Per-Willy Amundsen (OB).

Láhčá dili ođđa gearggusvuođaguovddážii

2018 stáhtabušeahtas evttohuvvo geavahit 660 miljovnna ruvnnu oažžut sadjái politiija nationála gearggusvuođaguovddáža Taraldrud nammasaš báikái Ski suohkanis.

Gearggusvuođajoavku, bombajoavku, heahtedille- ja gisselsoabadanbálvalus ja politiija helikopterbálvalus galget leat gearggusvuođaguovddážis. Go bálvalusat leat čoahkis, de sáhttet nationála gearggusvuođaresurssat buorebut ráhkkanit čoavdit doaimmaideaset. Evttohusa mielde gárvánivčče guovddáš jagi 2020 ja golut leat meroštallojuvvon váile 2,6 miljárdda ruvdnui.

– Juohke minuhtta lea dehálaš go duođalaš ja vuordekeahtes áššit dáhpáhuvvet. Gearggusvuođaguovddáš lea buorre dan dáfus ahte resurssat livčče olámuttus oanehis áiggis, ja fievrridanrusttegiid ja rivttes bargobiergasiid livčče maid álki fitnet, mii mielddisbuktá ahte nationála gearggusvuohta nannejuvvošii mearkkašahtti láhkai, dadjá Amundsen.

Golbma ođđa politiijahelikoptera loktenrusttegiiguin

Ráđđehus evttoha nannet nationála gearggusvuođa vel eanet go juolluda 102,8 miljovnna ruvnnu oastit 2018:s golbma ođđa politiijahelikoptera main leat loktenrusttegat. Dat galget leat Politiija nationála gearggusvuođaguovddážis Taraldrud nammasaš báikkis.

– Politiijahelikopterat gádjot heakka, ja investeremii lea duohta dárbu. Terrordaguid dahje eará duođalaš dáhpáhusaid olis lohkko juohke sekunda. Go resurssat leat ovtta báikkis, de sáhttet helikopterat buorebut veahkehit politiija terrordaguid ja eará duođalaš vearredaguid oktavuođas, cealká Amundsen.

Evttohus mielddisbuktá ahte helikopterbálvalus buoriduvvo mealgat eanet go dál, maiddái Oslo-guovllu olggobealde. Go gávdnojit golbma politiijahelikoptera, de lea vejolašvuohta ovtta sirdit eará báikái riikkas muhtun áigodahkii, ovdamearkka jos leat dieđut ahte duođalaš vearredagut sáhttet čađahuvvot muhtun dilálašvuođaid dahje stuorit plánejuvvon doaluid oktavuođas.

Ođđa helikopterat sáhttet fievrridit guhtta olbmo lassin fievrrideaddji ja girdet viidábut go dálá politiijahelikopterat.

Helikopterat galget geavahuvvot ohcamii, dárkumii, vákšumii ja bargiid fievrrideapmái. Maiddái deaivilis báhččit besset geavahit helikopteriid. Helikopterat leat huksejuvvon dainna lágiin ahte daid sáhttá heivehit iešguđetlágan doaimmaid ektui.

Evttohit nannet olggut rájá bearráigeahču

Ráđđehus evttoha juolludit 104,3 miljovnna ruvnnu nannet olggut ráji bearráigeahču hehtten dihte terrordaguid Norgga bealde.

– Ráđđehus háliida geavahit badjelaš 104 miljovnna ruvnnu viiddidit ja čavget bearráigeahču sihke girdišiljuin, mearrarádjeguovlluin ja Storskog rádjestašuvnnas. Dat galgá buoridit dorvvolašvuođa ja sihkkarvuođa Norggas ja muđui Schengen-guovllus, dadjá justiisaministtar Per-Willy Amundsen (OB).

Juolludus galgá gokčat politiija lassigoluid maid rádjegozáhusnjuolggadusaid artihkal 8 rievdadeapmi lea mielddisbuktán. Artihkal 8 geatnegahttá bearráigeahččat olbmuid geat rasttildit Schengen-guovllu olgorájá.

Ođđa mearrádusat, mat rievdadit Schengen-guovllu rádjegozáhusnjuolggadusaid, doaibmagohte EO-miellahttoriikkain cuoŋománu 7.b.2017. Norggas dat ledje fámus miessemánu 1.b.

Njuolggadusat mielddisbuktet earret eará ahte EO/EES-ássit ja sveicalaččat geat rasttildit Schengen-guovllu olgorájá šaddet vásihit systemáhtalaččat vuđoleappot ja viiddiduvvon rádjebearráigeahču.

– Ođđa njuolggadusat mat geatnegahttet čavget bearráigeahču girdišiljuin, mearrarádjeguovlluin ja Storskog rádjestašuvnnas mielddisbuktet politiijasuorgái lassi goluid. Jos vel juolludat ge 104 miljovnna ruvnnu, de eat sáhte hehttet sávakeahtes olmmošráidduid muhtun áigodagaid, dan sivas go bearráigeahčču lea čavgejuvvon, erenoamážit váldogirdišiljuin, loahpaha Amundsen.