Njoammuneastadandoaimmat rievdaduvvojit Svalbárdda- ja cruisefanasmátkkiide norggarittus

Dál šaddá fas vejolaš lágidit cruisefanasmátkkiid norggarittus ja Svalbárddas mearriduvvon eavttuid vuođul, ja chartergirdit sáhttet maid girdit nannámis Svalbárdii. Buot rievdadusat bohtet fápmui sotnabeaivvi geassemánu 20.beaivvi diibmu 12.00.

-Lea dehálaš ahte Svalbárda maid beassá rahpat servodatdoaimmaid, seamma go mii. Mii leat erenoamážit suddjen Svalbárdda pandemiija áiggi, earret eará danne go dearvvašvuođagearggusvuohta ii leat nu nanus doppe. Dál mis lea čuovgadat dilli, ja lean ilus go beassat veahážiid mielde ložžet doaimmaid, dadjá justiisa- ja gearggusvuođaministtar Monica Mæland (O). 

Mátkkošteddjiid lassáneapmi sáhttá dagahit ahte eanet olbmot ožžot njoammudávdda, ja dat iešalddis sáhttá šaddat hui hástaleaddjin guovllu dearvvašvuođa gearggusvuhtii ja áššeolbmá gádjunresurssaide. Geográfalaččat lea Svalbárda dakkár guovllus gosa ádjána guhkká oažžut dakkaviđe dearvvašvuođaveahki, ja jos njoammudávda leavvá menddo sakka Svalbárddas ja buhcciid ferte fievrridit nannámii de dat sáhttá šaddat hui hástaleaddjin.

Danne fertet joatkit muhtun njoammuneastadandoaimmaid sin ektui geat mátkkoštit Svalbárdii vai njoammudávda ii leava viidát. Dat mielddisbuktá ahte Svalbárddas rahppojuvvojit servodatdoaimmat dađis ja eanet várrugasat go nannámis.      

Mátkeealáhus Svalbárddas
Gáddevuđot mátkeealáhusa sierra bagadallanortnet Svalbárddas heaittihuvvo ja dan sadjái boahtá ortnet mii geatnegahttá buot fitnodagaid mat fállet mátkeealáhusbálvalusaid čuovvut njoammuneastadannjuolggadusaid ja riikkaviidosaš ávžžuhusaid ja gustojeaddji suorgestandárddaid, seamma go nannámis.

Idjadanbáikkit Svalbárddas galget beassat  geavahit 90 proseantta idjadankapasitehtas, ja gáibádus gáddevuđot mátkeealáhussii ahte ráhkadit sierra plánaid maid Áššeolmmái ja earát galget dohkkehit galgá maid sihkkojuvvot.

Loahppa 10 proseantta idjadankapasitehtas galgá vuoruhuvvot idjadangussiide geat fertejit mannat mátkkoštankarantenii ja sirremii.

Ráđđehus ii rávve šat garvit dárbbašmeahttun sisriikkamátkkiid, ja chartermátkkit Svalbárdii mannet fas dábálaččat nannámis.

Cruisefanasmátkkit norggarittus ja Svalbárddas
Nu go ovdal dieđihuvvon de sáhttá cruisefanasmátkkiin geavahit koronaduođaštusa go servodatdoaimmaid rahpanplána goalmmát muttus. Jos suddjekeahtes olbmot bohtet cruisefatnasiidda gos leat ollu olbmot, de lea stuorra várra ahte njoammudávda leavvá fas ođđasit. Diimmá njoammunvásáhusat čájehit ahte mii fertet leat hui várrugasat  danne go njoammuma lea váttis hálddašit fatnasiid  alde.

Cruisefatnasiidda rahppo dál vejolašvuohta lasihit mátkkošteddjiid logu jos koronaduođaštusa bokte duođaštit ahte sii leat suddjejuvvon.  

Ovdal cruisefanasmátki galgá duođaštus addojuvvot Áššeolbmái ahte láhkaásahusa gáibádus lea čuvvojuvvon. Cruisefatnasiin mat johtet norggarittus ja Svalbárddas ráddjejuvvo mátkkošteddjiid lohku eanemusat 200 olbmui jos mátkkošteaddjit ja bargit eai leat suddjejuvvon.

Svalbárdda cruisefatnasat mat lágidit mátkkiid eanemusat 200 suddjekeahtes olbmuin fertejit mátkkiid álggahit ja loahpahit Svalbárddas. Jos buot mátkkošteaddjit ja bargit leat suddjejuvvon, de sáhttet fatnasis leat eanemusat 2000 olbmo. Lea vejolaš geavahit 90 proseantta kapasitehtas. Dasto gáibiduvvo Svalbárdda cruisefatnasiin ahte dat galget  boahtit ruovttoluotta nannámii dahje ruovttuhámmanii jos váruhuvvo dahje duođaštuvvo ahte muhtun lea dohppehallon SARS-CoV-2 virusii.

Gielddus boahtit gáddái gusto dušše cruisefatnasiidda mat johtet riikkain gos lea karantenageatnegasvuohta dahje jos fanas mátkki vuolde váldá mielde olbmo gii boahtá riikkas gos lea karantenageatnegasvuohta dahje jos mátkkošteaddjit dahje bargit mátki vuolde leat fitnan gáttis dakkár guovllus gos karantenageatnegasvuohta lea.

Jos cruisefanasmátkki loahpageahčen váruhuvvo ahte muhtun fatnasis lea dohppehallon njoammudávdii, de galget buohkat bissut fatnasis dassá go dearvvašvuođaeiseválddit leat mearridan mo njoammundilli  galgá hálddašuvvot.