Korona-iskan vuoruhuvvo

-Lihkus sáhttit mii dál fas máhccagoahtit dábálaš árgabeaivái. Eatnašat leat dál ollásit boahkuhuvvon ja dávda ii njoamo šat nu johtilit go ovdal. Dattege ii leat koronapandemiija oalát nohkan, ja danne lea ain dárbu joatkit korona-iskosiid. Korona-iskan galgá ain leat nuvttá fálaldat, ja stáhta áigu nu go ovdal gokčat gielddasuorggi covid-19-goluid, dadjá dearvvašvuođa- ja fuolahusministtar Bent Høie.

Olles koronoapandemiija áiggi leamaš covid-19-iskan nuvttá fálaldat. “Muddejuvvon TISK” doaibmagođii čakčamánu 27.beaivvi. Dat mearkkaša ahte dál eai dárbbaš šat nu ollugat  mannat erremii, muhto eanet olbmot fertejit iskkahit iežaset. Dál go servodatdoaimmat fas rahpasit, de lea dehálaš ahte olbmot iskkahit iežaset dávjjibut. vai njoammudávdda nagodat bissehit.   Dearvvašvuođaeiseválddit ávžžuhit buohkaid iskkahit iežaset jos leat ožžon vuoiŋŋahatdávdamearkkaid, ja boahkutkeahtes lagašolbmot geat orrot ovttas buhcciin ávžžuhuvvojit maid iskkahit iežaset.   

Iskanfálaldat mii lea nuvttá ja olámuttus sáhttá mielddisbuktit ahte dat geavahuvvo liiggás ollu ja badjelmearálaččat. Ráđđehus lea mearridan, Dearvvašvuođadirektoráhta fágalaš ávžžuhusaid vuođul, vuoruhit nuvttá korona-iskosiid sidjiide geat leat ožžon vuoiŋŋahatdávdamearkkaid, boahkutkeahtes lagašolbmuide ja boahkutkeahtes mánáide ja nuoraide geaid lea dárbu jeavddálaččat iskkahit.  Dearvvašvuođadirektoráhta áigu gielddaide juohkit korona-iskosiid namuhuvvon vuoruhemiid vuođul.  Dalle leat gielddain doarvái iskosat maid sáhttet fállat vuoruhuvvon joavkkuide, ja sis lea maid dalle iskangearggusvuohta juohkit iskosiid jos njoammudávda  leavvá báikkálaččat.

Dearvvašvuođadirektoráhta ja Álbmotdearvvašvuođainstituhtta leat ožžon bargun rávvet gielddaid guđe joavkkut galget oažžut nuvttá iskosiid ja geat galget vuoruhuvvot, ja addit láidestusaid guđe iskosiid olbmot berrejit oastit.    

Iskanortnet koronaduođaštusa várás heaittihuvvo
Koronaduođaštus sisriikkajohtalussii heaittihuvvui go lávkiimet muddui “Dábálaš árgabeaivi nannoseabbo gearggusvuođain” čakčamánus 25.beaivvi. Danne heaittihuvvo maid iskanortnet koronaduođaštusa várás, maid priváhta lágideaddjit fertejedje geavahit.