Koronaduođaštus – evttohus rievdadit njoammuneastadanlága

Evttohusain maid láhčet vuođu EU-láhkaásahussii, maid leat plánemin, ja addet Dearvvašvuođa- ja fuolahandepartementii fápmudusa dárbbu mielde muddet koronaduođaštusa geavaheami láhkaásahusain.

– Koronaduođaštusa geavaheapmi sisriikkas lea vuosttažettiin áigeguovdil almmolaš doaluin, cruise- ja eará “páhkkamátkkiid” oktavuođas, nu mo Dearvvašvuođadirektoráhtta ja Álbmotdearvvašvuođainstituhtta leat ávžžuhan. Mii árvvoštallat maid leago áigeguovdil geavahit duođaštusa eará surggiin ja gielddain, main leat čavgadut ráddjehusat go riikkas muđui, dadjá dearvvašvuođa- ja fuolahanministtar Bent Høie.

Ráđđehus lea dáhtton etáhtaid árvvoštallat leago vejolaš váldit atnui koronaduođaštusa árat go servodatdoaimmaid rahpama goalmmát muttus iešguđet surggiin, ja lea bivdán sin árvvoštallat báikkálaš geavahusa.

Rahpet servodatdoaimmaid johtileappot
– Ráđđehus oaivvilda, ahte koronaduođaštusa vehkiin sáhttá servodatdoaimmaid rahpat dađistaga ja kontrollain. Dat sáhttá mielddisbuktit servodatdoaimmaid jođánut rahpama riikaviidosaččat, čujuha Høie.

Koronaduođaštusa eai šat áiggo geavahit, go njoammunlogut ja boahkuheapmi mielddisbuktet, ahte ráddjehusat eai šat dárbbašuvvo. Maiddái EU-mearrádusat dahkkojuvvojit dihto áigái. Juohke riika mearrida ieš man muddui daid váldet atnui iežaset riikkas.

– Norgga koronaduođaštusa vuosttaš veršuvdna lea jo neahttasiiddus helsenorge.no. Duođaštus čájeha iskosiid bohtosiid ja leatgo boahkuhuvvon korona vuostá. Mii leat dál ovddideamen koronaduođaštusa dakkárin, ahte dat čuovvu EU rámmaid. Koronaduođaštus galgá doaibmat sihke riikka siste ja rájáid olggobealde, dadjá Høie.

Gulaskuddan
Dearvvašvuođa- ja fuolahandepartemeanta sáddii miessemánu 5. b. 2021 gulaskuddamii evttohusa njoammuneastadanlága ođđa ja gaskaboddasaš kapihttalin 4a. Departemeanta oaččui oktiibuot 10 572 gulaskuddancealkámuša. Sii leat lohkan visot cealkámušaid, ja dat ságaškuššojit departemeantta árvvoštallamiin.

Ollugat beroštit koronaduođaštusas ja gulaskuddaninstánssain leat iešguđet oaivilat duođaštusa ásaheami hárrái. Muhtumat sávvet bures boahtima duođaštussii ja oidnet dan ávkkálaš ja vuoiggalaš reaidun, man vehkiin beassat rahpat servodaga doaimmaid.

Muhtumiid mielas koronaduođaštus áitá Norgga servodaga. Almmolaš etáhtat ja stuorra organisašuvnnat leat eanaš miehtemielalaččat evttohussii. Muhtun universiteahtajuristtat oaivvildit ahte duođaštusa láhkavuođu gáibádusat eai ollašuva. Sullii 10 500 priváhtaolbmo leat čállán
gulaskuddancealkámuša. Eanaš sis leat kritihkalaččat koronaduođaštusa ortnegii.

Loga gulaskuddama dáppe:

Gulaskuddan koronaduođaštusa birra – njoammuneastadanlága rievdadusat - regjeringen.no