Geardedivat losimus elbiillaide

– Ráđđehus áigu ain láhčit buorre divatortnega biillaide mat eai luoitte nu ollu birasgásaid, ja biillaide mat eai oba luoitte ge birasgásaid, ja árvvosmahttit ođđa biillaid mat vuhtiiváldet birasseastima, dadjá finánsaministtar Siv Jensen (OB).   

– Ráđđehus lea maŋimuš jagiid rievdadan vuodjinfievrruid geardedivada eanet birasseasti guvlui vai johtolagas livčče biillat mat eai luoitte nu ollu birasgásaid. Rievdadeapmi lea váikkuhan dasa ahte dál vuvdojuvvojit eanet biillat mat eai luoitte nu ollu birasgásaid, ja nu lea ge vejolaš juksat Stuoradikki mihttomeari ahte jagi 2020 galgá gaskamearálaš CO2-luoitin ođđa biillain 85 grámma kilomehteris, lohká finánsaministtar Siv Jensen.   

Geardedivat mearriduvvo birasgásaid luoitima ja lossodaga vuođul. Geardedivada rievdadeapmi, mas divada sturrodat meroštallojuvvo luoitima vuođul, lea mielddisbuktán ahte geardedivatárvu biillain mat eai luoitte birasgásaid ii leat šat nu stuoris. Eanaš elbiillaide ii mearkkaš divatluvven maidige.  

Elbiilovdamunit leat ollu vearro- ja divatvuogádagas, ovdamearkka dihte go eai dárbbaš máksit lassiárvodivada.  Ráđđehus evttoha jagi 2018 bušeahtas heaittihit elbiillain  johtolatdáhkádusdivada ja ođđasitregistrerendivada. Buot elbiillaid eaiggádiidda lea dat buorre go eai dárbbaš divadiid máksit ja dat movttiidahttá eambbosiid oastit geavahuvvon elbiillaid.

Geardedivada luvven boahtá sidjiide buorrin geat ostet lossa, divrras elbiillaid. Lassiárvodivatluvven mielddisbuktá ahte seastá ollu ruđaid jos oastá stuora divrras biilla. Ovdamearkka dihte jos  elbiila máksá 200 000 kruvnnu, de ii dárbbaš máksit 50 000 kruvnnu sturrosaš lassiárvodivada, ja jos elbiila máksá 1 000 000 kruvnnu de dahká lassiárvodivatluvven 250 000 kruvnnu. Geardedivada ii dárbbaš máksit biillaid ovddas mat mákset 200 000 kruvnnu ja mat deddet 2,4 tonna, ja luvvemis ii leat mearkkašupmi smávit elbiillaide maid lossodat lea váile 1,6 tonna.

Ráđđehus evttoha elbiillaide seammalágan lossodatgessosa go hybridabiillain maid ferte láddet, dás maiddái hydrogenabiillat, ja evttoha maiddái ahte lossodatgeasus galgá vuoliduvvot 26 proseanttas 23 prosentii. Geardedivat meroštallojuvvo biilla iešdeattu ja CO2 ja NOx luoitima vuođul. Elbiillaid dáfus máksojuvvo divat dušše deattu vuođul.

Tabealla čájeha geardedivada sturrodaga elbiillaid iešdeattu ektui.

 

Tabealla 1: Evttohuvvon geardedivat elbiillaide, meroštallojuvvon iešguđet deattuid vuođul.  

Iešdeaddu	Geardedivat*
2 000   kg	0 kruvnnu
2 250   kg	35 900 kruvnnu
2 500   kg	82 800 kruvnnu

 

*Dasa lassin boahtá vel 2 400 kruvnnu sturrosaš ráhtomáksodivat mii čuovvu geardodivada ja mákso buot biillaid ovddas.

Ráđđehus evttoha ahte rievdadusat galget doaibmagoahtit ođđajagimánu 1.b.2018.

Loga eanet Prop. 1 LS (2017–2018) Skatter, avgifter og toll 2018 čuokkis 9.4.3.