Jahkedivat rievdaduvvo 2018 rájes

– Ollugiid mielas lea vuoigatmeahttun ahte otná jahkedivvadis lea okta stuora fakturá máksináigemearrái. Divat iige leat čadnon vuodjinfievrru geavaheapmái. Rievdadeapmi dahká árgabeaivvi álkibun biilavuddjiide. Dasa lassin šáddá álkit ja hálbbit hálddašit ortnega, dadjá ruhtadanministtar Siv Jensen (OvB). 

2017 stáhtabušeahtas ráđđehus háliida lonuhit jahkedivada johtolatdáhkádusdivvadiin. Ortnet mielddisbuktá ahte sis geat mákset mánnosaš dáhkádustermiinnaid divat juhkkojuvvo oassemáksimiidda.  Dainna garvet ovtta stuora, jahkásaš fakturá, nu mot odne lea.

Dát dásse biilaeaiggádiid ekonomalaš noađuheami.

Eambbo geavaheaddjiustitlaš

Johtolatdáhkádusdivat galgá dušše máksot dan áiggi ovddas go vuodjinfievru lea dáhkiduvvon. Biilaeaiggát maid beassá máksimis divvada biillas jus heaittiha registrerema ja dáhkádus bissehuvvo, ovdamearkka dihte jus biila ii adno dálvejahkebealis.

Evttohus maiddái dahká mihá álkibun ovdamearkka dihte eaiggátmolsumis ja biilaráđuid dáfus. Earret eará garvá ahte gártet dievva biilaráđut ovdal njukčamanu 20.b. ja suoidnemánu 1.b.

Odne šattat ovdamearkka dihte máksit bealle jahkedivvada (suoidnemánu 1.b. rájes) jus oasttát biilla juovlamánus. Johtolatdáhkádusdivvadiin mávssát dušše daid beivviid ovddas mat jagis vel leat báhcán.

Álkit hálddašit

Buot sierradivvadiin lea jahkedivat mas stáhtii leat alimus hálddahuslaš golut. Ođđa divvada šaddá mihá álkit hálddašit go otná jahkedivvada. Eanas oasi otná goluin sáhttá seastit sisa.

– Dát addá vuođu geahpedit almmolaš byrokratiija ja resursageavaheami, dadjá ruhtadanministtar.

Ruhtadandepartemeanta lea hábmen ođđa ortnega lagas gulahallamis dáhkádussurggiin.

– Mii leat hui duhtavaččat ovttasbargguin mii surggiin lea leamašan, dadjá Jensen.

Ođđa divat váldojuvvo juo atnui 2017:s. Dát lea daningo dáhkádusat mat ođastuvvojit 2017:s, maiddái bohtet gustot gokčame osiid 2018:s. 2018 divat ferte danin biddjot sisa gábáidusaide mat sáddejuvvojit 2017:s sidjiide geat leat máksán dáhkádusa jahkásaš termiinnain.

Ráđđehus evttoha danin addit Ruhtadandepartementii fápmudusa mearridit muhttádusnjuolggadusaid johtolatdáhkádusdivvada meroštallamii ja raporteremii áiggis 2018 rádjái.