Boazodoallu mávssolaš Norgii biebmoriikan

Eanandoallo- ja biebmoministtar Olaug Bollestad lea deaivvadan Bohccobierggu márkanlávdegotti jođiheddjiin, John Anders Lifjellain, njukčamánu 2. beaivve. Deaivvadeamis ságaškušše man láhkai boazodoallu sáhttá searvat, go čuovvulit Norgga strategiija biebmoriikan.

– Boazodoallu lea lunddolaš ja mávssolaš oassi, go geahčadit Norgga biebmoriikan, sihke borramuša dáfus ja mátkeealáhusa dáfus. Mii ovddidit Norgga biebmoriikan ovttasbarggus, masa ealáhus ieš searvá, ja maiddái almmolaš ja eaktodáhtolaš suorgi. Boazodoalus leat áidnalunddot valljodagat, ja lea dan dáfus mávssolaš osolaš. Danin mii dárbbašit buori gulahallama boazodoalu ovddasteddjiiguin dan birra mo ealáhus sáhttá searvat, ja makkár hástalusat ja vejolašvuođat dasa leat, dadjá eanandoallo- ja biebmoministtar Olaug Bollestad.

Strategiija olis ovddidit earret eará nana borramuš- ja mátkkoštanguovlluid. Strategiija čuovvuleami olis lágidit 2021 áigge iešguđet guovlluin álggahankonferánssaid.

Ášši joatkašuvvá gova vuolábealde.

Stuorit gova

Čoahkkimis hástaledje Márkanlávdegotti evttohit geat boazodoalus sáhtášedje doaibmat departemeantta gulahallanolmmožin strategiija čuovvuleami oktavuođas. Dan lassin ávžžuhit buot borramuš- ja mátkkoštanealáhusa aktevrraid doaibmat aktiivvalaččat, ja váldit alcceseaset oasi Norgga ovddideames biebmoriikan daid rámmaid vuođul, mat strategiijas bohtet ovdan.

– Boazodoalus leat ollu gelddolaš fitnodagat, mat barget sihke biergobuvttademiin ja mátkkoštanealáhusain. Háliidan erenoamážit namuhit Davvi Siidda ja Røros rein. Fitnodagat leat ovdánan áiggi mielde dađistaga go márkanat leat ovdánan, ja daid vuođđun lea nana máhttu ja vásáhusat, maid vuolggasadjin lea iežaset boazodilli. Dat leat leamaš innovatiivvat, ja leat jo ožžon máŋggaid bálkkašumiid ja positiiva beaggima, mii lea buktán buriid váikkuhusaid sihke báikkálaččat, guovllu dásis ja riikka dásis. Dákkár fitnodagaid vásáhusat leat mávssolaččat, go čuovvulit biebmostrategiija, Márkanlávdegotti jođiheaddji, John Anders Lifjell, dadjá.

Norga Biebmoriikan -strategiija ovdanbuktojuvvui guovvamánu 12. beaivve. Golbma biebmodepartemeantta; Eanadoallo- ja biebmodepartemeanta, Ealáhus- ja guolástusdepartemeanta ja Dearvvašvuođa- ja fuolahusdepartemeanta, leat ráhkadan strategiija ovttasbarggus. Strategiija ulbmilin lea čohkket ja čalmmustahttit golmma departemeantta politihka oktasaš rámman, ja nu čájehit makkár ollislašvuhtii dat gullet, ja mo dat duddjojit ovdáneami ja árvoráhkadeami.

Strategiijas leat njeallje áŋgiruššansuorggi:

1. Alla kvaliteahta, ceavzilis, oadjebas ja dearvvašlaš borramuša buvttadeapmi ja fállan.
2. Ásahit vuođu ovdáneapmái ja árvoráhkadeapmái miehtá riikka.
3. Innovašuvdna ja máŋggadáfotvuohta.
4. Gelbbolašvuohta, rekruteren ja beaggima ovddideapmi.

• Loga eanet Norga biebmoriikan -strategiija birra – Ráđđehus ovdanbuktá iežas strategiija, mainna ovddidit Norgga biebmoriikan