Soahpan ođđa boazodoallošiehtadusa

- Lean ilus go leat ovtta oaivilis ođđa boazodoallošiehtadusa hárrái. Šiehtadus vuoruha doaibmabijuid mat galget movttiidahttit eanet njuovvat ja vuovdit bohccobierggu. Dat addá vuođu positiiva ovdáneapmái, ja dilli láhččojuvvo daid boazodolliide geain boazodoallu lea váldoealáhussan, cealká eanandoallo- ja biebmoministtar Sylvi Listhaug. 

• Loga 01.07.2015 – 30.06.2016  boazodoallošiehtadusa (pdf)
• Loga loahppabeavdegirjji (pdf)

Soahpamuš mielddisbuktá boazodoalloealáhussii oktiibuot 113,0 miljovnna kruvnno ruhtadoarjaga. Dat lea 1,5 miljovnna kruvnno eanet, go dálá boazodoallošiehtadusas.

2015/2016 boazodoallošiehtadusa váldoulbmil lea ovddidit boazodoalloealáhusa rationála ealáhussan, mii doaibmá márkaniid vuođul ja mii lea nanus guhkes áiggi perspektiivvas. 

Boazologu geahpedeapmi

Boazodoallu lea dál loahpageahčen dan golmma jagi proseassas maid Boazodoallostivra lea mearridan boazologu geahpedeapmái. Dan oktavuođas oasálaččat oidnet mávssolažžan doalahit dálá doarjjaortnega váldolinjjáid, nu ahte njuolggodoarjagat leat ain čadnojuvvon buvttadanárvui.

- Šiehtadus ovddida stáđisvuođa ja diehttevašvuođa boazodoallošiehtadusa ortnegiidda. Dat lea maid mielde doarjumin daid boazodolliid geat čuvvot boazologu geahpedanmearrádusaid, dadjá eanandoallo- ja biebmoministtar Sylvi Listhaug. 

Eanet njuovvat ja vuovdit bohccobierggu

Šiehtadusa oasálaččat oidnet mávssolažžan ahte Boazodoallošiehtadus 2015/2016 vuoruha erenoamáš doaibmabijuid mat lasihit njuovvamiid ja bohccobierggu vuovdima. Boazodoalu infrastruktuvra nannejuvvo. Buvttadanvuđot doarjjaortnegat lasihuvvojit erenoamážit movttiidahttiin dihte boazoeaiggádiid eanet njuovvat ja vuovdit bohccobierggu. Seammás joatkašuvvá Bohccobierggu márkanlávdegotti bargu, mii galgá ovddidit neutrála márkaniid bohccobierggu várás.     

Ođđa raporteren- ja klassifiserenvuogádat bohccobierggu várás

Dainna ulbmilin ahte oažžut čielgaseabbo dieđuid njuovvanbohccuin, ja boazoeaiggáda tietnasa loktet, lea dál dárbu geahčadit olles árvogollosa duoddaris borranbeavdái. Šiehtadusa oasálaččaid mielas lea dárbu ásahit ođđa raporteren- ja klassifiserenvuogádaga bohccobierggu várás, nu ahte dat doaibmagoahtá čakčat 2015. Ođđa klassifiserenvuogádat bálkkašivččii buriid njuovvanbohccuid, ja movttiidahtášii boazoeaiggádiid njuovvat ja buvttadit eanet juohke bohcco ovddas. 

Árvoráhkadeami ovddidanvejolašvuođat 

Boazodoallu lea dakkár erenoamáš dilis ahte dat sáhtašii lasihit árvoráhkadeami ollu eanet go dál. Šiehtadalliid mielas lea dehálaš láhččit dili nu ahte boazodoallu beasašii geavahit buot vejolašvuođaid ovddidit árvoráhkadeami. 2015/2016 boazodoallošiehtadus movttiidahttá eanet buvttadit, ja das lea maid doarjjaortnegat ovddidit oahppo- ja fuolahusbálvalusaid boazodoalus.