Ávžžuhit leat jođekeahttá maidge riikkaide, jos ii leat duođaid vealtameahttun

- Mii leat duođalaš dilis, ja lea váddásut ja váddásut einnostit mo dilli rievdá ovddos guvlui. Mii vuoruhit eallima ja dearvvašvuođa ja dat gáibida mis erenoamáš doaimmaid. Dilli rievdá johtilit ollu riikkain ja danin mii ávžžuhit leat jođekeahttá maidge riikkaide, jos ii leat áibbas vealtameahttun, stáhtaministtar Erna Solberg dadjá.

Koronavirus njoammu eanet ja eanet olbmuide máŋgga riikkas. Dilli daid riikkain, main virus lea njommon ollugiidda, rievdá johtilit iige leat einnosteames.

- Riikkat soitet hui johtilit ráddjet johtima, bágget orrut dihto áiggi sierralagaid go olbmot bohtet riikkain main lea koronavirus, ja rájiid soitet giddet, girdiruvttuid šluhttejit dahje čađahit eará doaimmaid. Olgoriikkadepartemeanta ávžžuha buot Norgga riikkavuložiid, geat leat johtimin olgoriikkas, árvvoštallat vuolgit ruoktot johtileamos lági mielde, oadjebasat ja ráfálaččat, ovttasráđiid mátke- dahje girdifitnodagaineaset. Norgga riikkavuložat, geat bissovaččat orrot olgoriikkas, berrejit čuovvut báikkálaš eiseválddiid rávvagiid ja bagadallama. Dearvvašvuođavuogádagat riikkain, main ollu olbmot leat njomohallan, vásihit ahte ollugat dárbbašit veahki. Go dilli dál rievdá nu johtilit, de lea mávssolaš rávvet olbmuid, dadjá olgoriikkaministtar Ine Eriksen Søreide.

Dat lea maid mávssolaš vuohki searvat riikkaidgaskasaš bargui.

- Mii fertet hehttet njoammuma riikkaidgaskasaččat, ja leat erenoamáš fuolas das mii dáhpáhuvvá, go virus njoammu rašes riikkaide, maid dearvvašvuođavuogádagat eai leat nu nannosat, dadjá olgoriikkaministtar.

Olgoriikkadepartemeanta čuovvu dili dárkilit ja ávžžuha buot norgalaččaid čuovvut báikkálaš ja olles riikka ođđasiid, erenoamážit dan hárrái man viidát virus lea njommon, ja čuovvut báikkálaš eiseválddiid dieđuid ja rávvagiid. Ođđaseamos dieđuid johtima birra buot riikkaide gávdná neahttasiiddus regjeringen.no/reiseinformasjon.

Riikkaide ja guovlluide, maidda Olgoriikkadepartemeanta lea jo rávven leat jođekeahttá, gusto johtinávžžuhus, mii lea jo addojuvvon.