Ođđa buhtadusortnet mediaide

Dálá koronaroasu áigge riikkaássit dárbbašit ollu dieđuid ja čuvvot hui ollu media. Seammás ollu mediafitnodagat vásihit ahte stuorra oassi sin máinnusboađuin jávket.

- Ráđđehussii lea mávssolaš ulbmil sihkkarastit ahte mediat sáhttet doalahit mávssolaš servodatdoaimmaset. Ráđđehussii ja Norgii lea mávssolaš, ahte mis leat kritihkalaš, bures doaibmi ja sorjjasmeahttun redakšuvnnat – sihke koronaroasu áigge ja dan maŋŋá, dadjá kultur- ja dásseárvoministtar Abid Q. Raja.

Ráđđehus árvala RNB olis ásahit gaskaboddasaš buhtadusortnega mediaide, main lea redaktevra njunnošis, ja mat leat vásihan ahte vuovdin lea njiedjan dihto veardde COVID-19 njoammudávdda geažil. Ortnega ulbmil lea doarjut mediaid, nu ahte dat sáhttet doalahit doaimmaset sihke koronaroasu áigge ja dan maŋŋá.

Árvaluvvo ásahit ohcanvuđot ortnega, maid Mediageahčču hálddaša. Árvaluvvo ahte buhtadusa sáhttet ohcat riikkaviidosaš mediat, maid vuovdin lea geahppánan unnimustá 20 proseantta njukčamánu 1. beaivvi rájes gitta geassemánu 15. beaivái COVID-19 njoammudávdda geažil. Báikkálaš ja guovlludási mediaid rádjin biddjo ahte vuovdin galgá leat geahppánan unnimustá 15 proseantta seammá áigodagas.

Mediat sáhttet oažžut buhtadusa eanemustá 60 proseanttas vuovdima geahppáneamis, dattetge eanemustá 15 miljovnna kruvnno. Buhtadus muddejuvvo dan ektui, leatgo bidjan journalisttaid bággolupmui dahje seastán/ožžon doarjaga eará COVID-19 doaimmaid olis. Ráđđehus árvala ortnega rámman eanemustá 300 miljovnna kruvnno. Jos ortnegis ohccojuvvo oktiibuot eanet, go rámman lea mearriduvvon, de fitnodagaid buhtadusat geahpeduvvojit ovtta dásis prosentuálalaččat.

Kulturdepartemeanta lea dál hábmemin ortnega njuolggadusaid, maid ferte notifiseret ja ESA ferte daid dohkkehit. Ortnet galgá maid sáddejuvvot gulaskuddamii, mii mearkkaša, ahte dat soaitá vel rievdat.