Jonas Gahr Støre lea riegádan borgemánu 25.b.1960. Son lea náitalan Marit Slagsvoldain. Sudnos leat golbma máná. Støre lea čađahan oahpu Mariidna Befálaskuvllas, Mearrasoahteskuvllas Bergenis, ja dan maŋŋil son válddii stáhtadieđa oahpu mas čiekŋudii historjái ja sosiálaekonomiijai Institut d'études politiques nammasaš instituhtas Parisas, Fránskkas 1981–1985.

Son virgáduvvui Stáhtaministara kantuvrra sierraráđđeaddin jagi 1989. 1995:s son nammaduvvui riikkaidgaskasaš ossodaga ekspedišuvdnahoavdan seamma bargosajis.  Dan maŋŋil lei son Gro Harlem Brundtland kantuvrra njunušgoddehoavda Máilmmi dearvvašvuođaorganisašuvnnas 1998-2000.

Jonas Gahr Støre doaimmai Jens Stoltenberg nuppi ráđđehusa olgoriikaministtarin jagi 2005 rájes jagi 2012 rádjai ja dan maŋŋil dearvvašvuođa- ja fuolahusministtarin jagi 2012 rájes gitta ráđđehusmolsuma rádjai jagi 2013. Son lei stáhtačálli ja njunušgoddehoavda Stáhtaministara kantuvrras jagi 2000 rájes jagi 2001 rádjai, ja muđui son dovdá bures ámmátásahusa ja humanitára organisašuvnnaid, earret eará lea son bargan Norgga Rukses Ruossa generálačállin jagi 2003 rájes 2005 rádjai.

Støre válljejuvvui Bargiidbellodaga bellodatjođiheaddjin jagi 2014 ja son lea doaibman stuoradiggeáirrasin Oslo ovddas jagi 2009 rájes. Son lea leamaš miellahttu finánsalávdegottis, olgoriika- ja suodjaluslávdegottis ja viiddiduvvon olgoriika- ja suodjaluslávdegottis.

Jonas Gahr Støre válljejuvvui stáhtaministtarin golggotmánu 14.b.2021.