Vuordináiggit galget oatnut – ráđđehus nanne buohcciviesuid 2 miljárdda ruvnnuin

– Mu deháleamos bargu dearvvašvuođa- ja fuolahusministtarin lea fuolahit ahte olbmot miehtá riikka leat oadjebasat das ahte sii ožžot alla kvalitehta dearvvašvuođaveahki go dárbbašit. Čálgostáhta galgá leat Norgga buoremus dearvvašvuođadáhkádus. Danne evttoha ráđđehus nannet buohcciviesuid 2 miljárdda ruvnnuin vai vuordináiggit otnot, dadjá dearvvašvuođa- ja fuolahusministtar Jan Christian Vestre.

Dán vahkku lea ráđđehus maiddái almmuhan Vuordináigelohpádusa ovttas Fágalihtuin, Norgga Buohccidivššárlihtuin, Doavttirservviin, Deltain, Psykologaservviin, Spekteriin, Virke-servviin ja NHO Geneo-servviin ja njeljiin regionála dearvvašvuođadoaimmahagain. Geatnegahtti ovttasbargguin mii áigut jorgalahttit treandda dán jagi juo earret eará poliklinihkaiguin mat leat rabas eahkediid ja vahkkoloahpaid, buoret bargoáigeortnegiiguin ja eanet ollesáigevirggiiguin, eanet ulbmillaš bargo- ja doaibmajuoguin ja eanet ovttasbargguin.

Ruđat mat dál bohtet reviderejuvvon nationálabušeahtas addet vejolašvuođa liigeáŋgiruššamii 2024:s mii oppalaččat galgá mannat doaibmabijuide mat johtilit oanidit vuordináiggiid, ja mat bistevaččat nannejit buohcciviesuid ekonomiija.

Ráđđehusa evttohus mielddisbuktá:

• 400 miljovnna ruvnno ruhtadit doaibmabijuid mat jođánit ja beaktilit sáhttet oanidit vuordináiggiid buohcciviesuin bistevaččat.
• 1150 miljovnna ruvnno bistevaččat lasihit vuođđodoarjaga mii galgá buorebut láhčit dili nu ahte buohcciviesut nagodit ollašuhttit bargguid ja gáibádusaid, dán vuolde maiddái vuordináiggiid oatnunmihtu.
• 100 miljovnna ruvnno buohcciviesuide nannet sihkarvuođapsykiatriija kapasitehta.
• 100 miljovnna ruvnno bistevaš rekrutteren- ja ovttasdoaibmandoarjagii, mii galgá nannet buohcciviesuid ja suohkaniid ovttasbarggu ja ovddidit oanehet vuordináiggiid.
• 250 miljovnna ruvnno sierradoarjjan Davvi Dearvvašvuhtii, rekrutteremii, ovttasdoaibmamii ja vuordináiggiid oanideapmái, fáhkkabuhcciidfálaldaga bisuheapmái Lufuohtá ja Áhkánjárgga buohcciviesuin, ja Álttá beaivefálaldaga doarjumii.

Tabealla. Bajilgovva juolludanevttohusas spesialistadearvvašvuođabálvalussii guđege RDD mielde. Miljovnna ruvnno.

RDD	Submi
Lullu-Nuorta Dearvvašvuohta	959
Oarji Dearvvašvuohta	339
Gaska-Norgga Dearvvašvuohta	251
Davvi Dearvvašvuohta	452
Submi	2000