Áigeguovdilis njuolggoliŋkkat

    Preassadieđáhusat

    Stáhtabušeahtta 2023

    Vearronjuolggadusat čavgejuvvojit petroleumsuorgái

    Preassadieđáhus | Nr: 47/2022 | Almmustahtton: 06.10.2022 | Ruhtadandepartemeanta

    Dát sisdoallu lea eanet go 2 jagis boaris.

    Oljohattit leat gorgŋon hirbmadit das rájes go petroleumsuorggi gaskaboddosaš vearronjuolggadusat ásahuvvojedje 2020:s. Danne háliida ráđđehus dál čavget njuolggadusaid.

    Ráđđehus evttoha čavget gaskaboddosaš vearronjuolggadusaid petroleumsuorgái. Evttohus mielddisbuktá ahte friddjaboađuid proseantamearri vuoliduvvo 17,69 proseanttas 12,4 prosentii.

    Friddjaboađuid proseantameari rievdadus guoská buot goluide mat fitnodagas leat ođđajagimánu 1.b.2023 rájes. 

    Stuoradiggi mearridii petroleumsuorgái gaskaboddosaš vearronjuolggadusaid geassemánu 2020, dan áiggi go ledje vuollegis oljohattit ja pandemiijaroassu. Dál lea dilli áibbas eará; alla oljo- ja gássahattit.  

    – Hui ollu investerenprošeavttat maidda njuolggadusat gusket, leat álggahuvvon maŋŋil go gaskaboddosaš njuolggadusat mearriduvvojedje. Neutrála vearronjuolggadusaid ferte dieđusge buohtastahttit gánnáhahttivuođain. Ráđđehusa evttohusa mielde leat buot gánnáhahtti investeremat ovdal sierravearu maiddái gánnáhahtti maŋŋil go vearru lea máksojuvvon, dadjá ruhtadanministtar Trygve Slagsvold Vedum (Gb). 

    – Ráđđehus oaivvilda ahte evttohusas lea govttolaš ja buorre dássetvuohta. Mii vuhtiiváldit ahte investeremat leat dahkkon gaskaboddosaš njuolggadusaid vuođul, muhto ekonomalaš dilli lea dál áibbas eará go dalle go njuolggadusat mearriduvvojedje, ja danne háliidat heivehit njuolggadusaid dálá dillái, dadjá ruhtadanministtar.

    Meroštallojuvvo ahte friddjaboađuid geahpedemiin lasihuvvojit vearroboađut 2 miljárdda ruvnnuin 2023:s. Stáhta sisaboađut lassánit 11 miljárdda ruvnnuin nu guhká go gaskaboddosaš njuolggadusat leat fámus. Lassiboađut sirdojuvvojit Oljofondii, nu ahte dat eai váikkut 2023-bušeahta doaibmavejolašvuhtii.   

    Bajás