Ođđa veahkaváldebuhtadusláhka boahtá fápmui ođđajagimánu 1. b. 2023

– Mun lean ilus go mii dáinna lágain oažžut beaktilet ja eanet einnostahtti veahkaváldibuhtadusortnega. Ođđa ortnet galgá sihkkarastit goasii automáhtalaš máksima sidjiide geat leat vásihan veahkaválddi geaidda lea mieđihuvvon buhtadusa duomu bokte. Dat dahká dál sullii 67 proseantta veahkaváldibuhtadusáššiin, dadjá justiisa- ja gearggusvuođaministtar Emilie Enger Mehl.

Ođđa veahkaváldibuhtaduslága ulbmil lea nannet sin riektesihkarvuođa geaidda ortnet guoská, earret eará álkes ja čielga njuolggadusaiguin, mat sihkkarastet dan ahte sii geat leat vásihan veahkaválddi álkibut sáhttet dovddiidit iežaset rivttiide ja jođánit oažžut buhtadusa máksojuvvot buhtadusa go eavttut dasa leat devdojuvvon.

Ođđa láhka lea ráhkaduvvon dábálaš buhtadusrievttálaš prinsihpaid vuođul. Dat mearkkaša earret eará ahte duopmostuollu galgá meannudit veahkaváldibuhtadusgáibádusa oassin ráŋggáštusáššis. Stáhta veahkaváldibuhtadusa máksu galgá oktiivástidit supmiin mii riekteáššis lea  adnojuvvon vahágahtti ovddasvástádussan. Buhtadus galgá máksojuvvot juo dakkaviđe riektevuoimmalaš duomu maŋŋel, ja almma ohcanproseassa haga. Stáhta áigu ovddidit regreassagáibádusaid vahágahttái buhtadussupmi ovddas.

Jus áššis ii leat duopmu celkojuvvon, ovdamearkka dihte ášši heaittiheami oktavuođas, de sáhttá son guhte lea vásihan veahkaválddi ohcat buhtadusa Veahkaváldegillájeaddjebuhtadusa kantuvrras. Ođđa lága mielde leat unnit gáibádusat árvvoštussii, ja dan dihte bohtet ohcamušat meannuduvvot jođáneappot. Ráđđehus áigu sihkkarastit ahte Veahkaváldegillájeaddjebuhtadusa kantuvra Várggáin ii galgga unniduvvot, muhto oažžut eará bargguid vai kantuvrra bargoveahka ii unniduvvo. Bargu veardidit doaibmabijuid movt nannet kantuvrra lea jođus.

– Jođánis čielggadeapmi geahpida dilálašvuođa veahkaválddi gillájeddjiide ja unnida sin ekonomalaš vuorjašumiid. Mun sávan maid ahte lea ávkin jođáneappot ja buorebut gieđahallat dan maid sii leat vásihan, dadjá justiisa- ja gearggusvuođaministtar Emilie Enger Mehl.

Ođđa láhka mielddisbuktá moanat rievdadusaid mat váikkuhit riektái oažžut veahkaváldebuhtadusa. Vai sidjiide geat leat vásihan veahkaválddi šaddá álkit gávnnahit maid dat mearkkaša sidjiide, geahča almmuhusa mii čilge rievdamiid oppalaččat.

Almmuheapmi ođđa veahkaváldebuhtaduslága fápmuibidjandáhtona oktavuođas