Nulla-višuvdna jápminlihkohisvuođaide eanandoalus ja boazoealáhusas
Ođas | Almmustahtton: 08.04.2024 | Maŋimuš ođasmahttojuvvon: 10.04.2024 | Eanadoallo- ja biebmodepartemeanta
Eanandoalus lei okta bargolihkohisvuođajápmin 2023, ja viđajageáigodagas ovdal 2023 ledje vihtta bargolihkohisvuođajápmima gaskamearálaččat jagis. Boazoealáhusas eai gávdno doarvái statistihkat jápminlihkohisvuođaid birra. Dasa lassin dáhpáhuvvet lihkohisvuođat, mat eai mielddisbuvtte jápmima, muhto main goitge leat duođalaš váikkuhusat sutnje gii bártida. Dan dihte lea dárbbašlaš bargat ulbmillaččat eastadan dihte nu ollu lihkohisvuođaid go vejolaš.
– Dáhpáhuvvet beare ollu jápminlihkohisvuođat. Mii fertet unnidit eanandoalu ja boazoealáhusa lihkohisvuođaloguid. Dan dihte bidjat mii johtui nulla-višuvnna. Olbmot galget dovdat oadjebassan iežaset barggus. Dál mii leat čohkken daid mávssoleamos oasálaččaid geat barget ealáhusaid DBS:in jápminlihkohisvuođaid nulla-višuvdnarahčamuššii, dadjá eanandoallo- ja biebmoministtar Geir Pollestad (GB).
Bargat searválaga nulla-višuvnna ektui eanadoalus ja boazoealáhusas
Odne vuolláičálle guovddáš oasálaččat áigumuššiehtadusa mas lea nulla-višuvdna eanadoalu ja boazodoalu jápminlihkohisvuođaid ektui. Ovttasbargu šiehtadusa oktavuođas lea mávssolaš lávki sihkkarastit ealáhusaid bargosajiid ja DBS-barggu. Okta mávssoleamos doaibmabijuin šiehtadusas lea kártet bargolihkohisvuođaid sivaid. Ulbmil lea oažžut eambbo máhtolašvuođa das mo sáhttá eastadit dákkár lihkohisvuođaid ja buoridit ealáhusaid sihkarvuođa.
Eanandoallo- ja biebmoministtar Geir Pollestad (GB) várre dál 400 000 ruvnno mainna galgá čielggadit ja eastadit lihkohisvuođaid sivaid.
–BB/GB-ráđđehus atná dehálažžan ahte olbmuin lea oadjebasvuohta barggus. Danne lea dehálaš čohkket máŋga iešguđet oasálačča oktasaš rahčamuššii, nu ahte sáhttit unnidit lihkohisvuođaid loguid, dadjá Pollestad.
Šiehtadusa oasálaččat ja ulbmil
Buot dat deháleamos oasálaččat mat barget DBS:in eanandoalus ja boazodoalus leat ovttaoaivilis jápminlihkohisvuođaid nulla- višuvnna birra. Galgat maiddái geahččalit unnidit daid dakkár lihkohisvuođaid, main leat duođalaš persovdnaroasmmahuvvama. Šiehtadusa oasálaččat leat Bargobearráigeahčču, Gjensidige, Eanandoalu buollinsuodjalanlávdegoddi, Eanandoallodirektoráhta, Eanandoallo- ja biebmodepartemeanta, Landkreditt dáhkádus, Biebmobearráigeahčču, Norgga Boanddaidsearvi, Norgga Boanddaid- ja Smávvadálolaččaidsearvi, Norgga Eanandoalloráđđeaddinbálvalus, Norgga Eanandoallobálvalusat, Norgga Boazosápmelaččaid Riikkasearvi ja Norsk Mat Vuođđudus.
Bealit leat geatnegahttán iežaset čađahit doaibmabijuid iežaset surggiin. Ođas ja dehálaš oassi šiehtadusas lea ahte áŋgiruššamat biddjojuvvojit buorebut oktii dan ektui mii ovdal lea dáhkkon. Jahkásaččat galget ráhkaduvvot oktasaš doaibmaplánat maid bokte buot bealit galget oainnusindahkat iežaset áŋgiruššama. Norgga Boanddaidsearvvis, Norgga Boanddaid- ja Smávvadálolaččaid Searvvis, Norgga Boazosápmelaččaid Riikasearvvis, Norgga Eanandoalloráđđeaddimis ja Norsk Mat Vuođđudusas lea váldoovddasvástádus ovttastahttit ja čuovvulit áigumuššiehtadusa.