Eai jávkat gottiid dábálaš bivddu lassin Hardangerduoddaris dán dálvve
Ođas | Almmustahtton: 11.02.2022 | Maŋimuš ođasmahttojuvvon: 14.02.2022 | Eanadoallo- ja biebmodepartemeanta, Dálkkádat- ja birasdepartemeanta
Eanandoallo- ja biebmodepartemeanta ja Dálkkádat- ja birasdepartemeanta leat boahtán dan oaivilii, ahte 2022 dálvvi eai jávkat eanet gottiid go dábálaš bivddu olis Hardangera duoddaris.
2016 gávdne klassihkalaš oaivevuori (CWD) Nordfjella gottiin. Bissehan dihte dávdda, de jávkadedje olles ealuid. Čakčamánu 3. beaivve 2020 dávda duođaštuvvui bivddu oktavuođas muhtun hearggis Hardangerduoddaris.
Hardangerduoddaris leavvagoahtán dávdda geahččaledje jávkadit dan láhkai ahte 2021 bivddu oktavuođas godde goasii visot badjel 3,5-jahkásaš sarváid ja 1000 – 1500 rávis álddu. Vaikko barge vuđolaččat, de eai juksan ulbmila. Veterinárainstituhtta čujuha ođaduvvon árvvoštallamiinnis, ahte Hardangerduoddaris leat vissásit ain muhtun gottit, maidda dávda lea njommon. Dat fuolastuhttá sakka.
Hardangera duoddara gottiid dilli ja láhtten, ja guohtunguovllu viidodat ja eanadaga hámit dahket dattetge hui váttisin jávkadit eanet go gottiid go dábálaš bivddu olis dán dálvve. Dat gáibidivččii ollu áiggi ja livččii divrras, iige leat jáhkehahtti ahte nagodivčče jávkadit doarvái elliid. Hardangera guovllus leat maid báikkálaččat vuostálastan sakka ealuid jávkadeami.
Ulbmilin ferte ain leat ráddjet dávdda leavvamis, ja jos vejolaš, de jávkadit klassihkalaš oaivevuori. Dat gáibida ollu buohtalas doaimmaid, ja ahte báikkálaš hálddahus ja bivdit ovttasbarget bures. Vaikko leage riska maŋidit gottiid jávkadeami 2022 čakčii, de lea menddo eahpesihkar fidnejitgo positiiva bohtosiid jávkadandoaimmain 2022 dálvve, dan ektui makkár negatiiva čuovvumušat doaimmain livčče.
Eanandoallo- ja biebmoministtar ja Dálkkádat- ja birasministtar leat danin boahtán dan oaivilii, ahte eai ávžžut jávkadit gottiid erenoamáš doaibmabijuid bokte 2022 dálvvi. Sii čuvvot Biebmogeahču ja Birasdirektoráhta fágalaš ávžžuhusaid.
– Ii leat álki ráddjet gottiid duođalaš dávdda leavvamis Hardangera duoddaris, dadjá eanandoallo- ja biebmoministtar Sandra Borch (GB).
– Erenoamážit rávis sarvát njoammudit dávdda viidáseappot ealus, muhto gáibiduvvojit ollu návccat jos áigu lihkostuvvat jávkadit gottiid, main dávda lea. Báikkálaččat leat maid nannosit vuostálastán Hardangerduoddara gottiid jávkadeami erenoamáš doaibmabijuiguin. Anán mávssolažžan láhčit dili boahttevaš hálddašeapmái, ja ahte báikkálaš návccat dorjot viidásut barggu, go dál čuovun ávžžuhusa, man mielde eat jávkat gottiid erenoamáš doaibmabijuiguin, dadjá Borch.
Biebmogeahčču ja Birasdirektoráhtta áigot ásahit bargojoavkku, mas iešguđet bealit leat bures ovddastuvvon, vai besset vuđolaččat gulahallat Hardangerduoddara gottiid hálddašeami birra. Leat diŋgon genetihka ja ealuid geahpedeami fágalaš árvvoštallama, mii gárvána njukčamánus 2022. Ávžžuhusat ja loahpalaš árvvoštallan Hardangerduoddara goddeealuid viidásut hálddašeami birra gárvánit 2022 geasi.
– Min ulbmil lea ain ráddjet dávdda leavvamis ja jos vejolaš de jávkadit klassihkalaš oaivevuori Norggas. Ulbmila juksama dáfus lea mávssolaš ain doalahit dábálaš bivddu váldovuohkin hálddašit ealu. Oaivevuori caggan gáibida ollu barggu guhkes áigge. Mun illudan ovttasbargui báikkálaččaiguin, go guhkes áigodagas bargat duođalaš dávdda vuostá, dadjá dálkkádat- ja birasministtar Espen Barth Eide (BB).
