Čeabetmearkkain sáhttá geahpedit miessemassimiid
Ođas | Almmustahtton: 10.11.2021 | Eanadoallo- ja biebmodepartemeanta
NIBIO-dutkaninstituhtta lea guovtti vuorus geahččalan plastihkkamearkkaid bidjat misiide. Dutkamat čujuhit čielgasit, ahte plastihkkamearkkat sáhttet suddjet misiid boraspiriin.
– Ráđđehus háliida čavget boraspirepolitihka, nu mo Hurdal-dulbosis čielgasit boahtá ovdan. Mii galgat geahpedit massimiid, dadjá eanandoallo- ja biebmoministtar Sandra Borch. – Dan oktavuođas NIBIO bohtosat leat hui miellagiddevaččat, son deattasta.
Geahččaleamit guovtti orohagas
NIBIO čađahii 2019 pilohttaprošeavtta Fiettara orohagas, Finnmárkkus. 60 miessái bidje čeabetmearkkaid, main ledje sáddenrusttegat, miessemearkuma rájes gitta čakčačohkkema rádjai. Buot miesit bisso heakkas. Go buohtastahttit eará misiiguin, de jávke ovcci proseantta misiin, main ii lean čeabetmearka, seamma áigodagas.
NIBIO háliidii geahččalit oččošedjego seammalágan váikkuhusa massimiidda Nordlándda orohagas. Nuba dat čađahii geahččaleami Duokta-orohagas, Nordlánddas 2020/21. Dalle geavahedje 25 mm govda čeabetmearkkaid; sihke dakkáriid, main lei GPS/GSM-sáddenrusttet, ja dakkáriid main ii lean rusttet.
Misiin, main ii lean čeabetmearka, jávke 40 %. Misiin, main lei čeabetmearka, mas ii lean sáddenrusttet, jávke guoktenuppelot proseantta. Misiin, main lei čeabetmearka, mas lei sáddenrusttet, jávke dušše golbma proseantta.
Čeabetmearkkat orrot suddjemin boraspiriid vuostá
NIBIO oaivvilda, ahte ii leat jáhkkemeahttun, ahte albbas ja goaskin leat oaidnán plastihkkamearkka ja elektrovnnalaš guohtungozihanrusttega jo guhkkin, ja nu leat garván falleheames miesi, dahje ahte mearka lea hehtten daid, go leat fallehan miesi.
NIBIO ovddida dál viidáseappot čeabetmearkkaid, mat hehttejit massimiid.
Ollu orohagain masset menddo ollu bohccuid boraspiriide. Jos plastihkkamearkkaid vehkiin sáhttit geahpedit miessemassimiid, de ferte dan vejolašvuođa guorahallat dárkileappot. Dakkár doaimmain sáhttit buoridit elliid buorredili, ja seammás sihkkarastit ealáhusa buvttadanboađuid, dadjá eanandoallo- ja biebmoministtar Sandra Borch.