Eai goassige ovdal leamaš nu ollu mánát skuvllaid astoáiggefálaldagas (SAÁF) go dál

Nuvttá SAÁF-sadji mielddisbuktá ahte bearrašat sestet sullii 20 000 kruvnnu jahkásaččat, ja ráđđehus čuovvula dan láhkai SAÁF áŋgiruššama Hurdal-soahpamuša mielde.   

Oahpahusdirektoráhta almmuha odne ođđa loguid, mat čájehit ođđa olahusa SAÁF-geavaheddjiid mearis, ja lassáneapmi lea stuorimus vuosttaš luohkás.

Olles 92 proseantta vuosttašluohkkálaččain geavahit dál skuvlaastoáiggefálaldaga (SAÁF), ja jagi 2021 lei lohku 83 proseantta. Lea maid eanet 2.-4.luohkká oahppit geat geavahit fálaldaga.    

Oktiibuot leat skuvllaid astoáiggefálaldagas 165 000 máná, dat lea 12 000 eanet go diibmá.    

Sivvan ođđa olahussii lea ahte ráđđehus diibmá juolludii 12 diibmosaš nuvttá SAÁF-sajiid, mii lea oassi Hurdal-soahpamuša čuovvuleamis. Hálbbit  SAÁF vuosttašluohkkálaččaide lasihii SAÁF-geavaheddjiid logu.   

Nuvttá SAÁF addojuvvo maiddái nuppiluohkkálaččaide

Čavčča rájes viiddiduvvo ortnet ja 12 diibmosaš nuvttá SAÁF addojuvvo maiddái nuppiluohkkálaččaide

-Ráđđehus háliida ahte buot mánát galget oažžut SAÁF-saji. Dat lea buorre fálaldat gos mánát besset ovttastallat ja čatnat sosiála oktavuođaid.  Hálbbit SAÁF veahkeha ollu bearrašiid ekonomalaš hástaleaddji áiggis. Danne lea mu mielas riekta ráđđehusas ja Sosialisttalaš gurutbellodagas vuoruhit nuvttá sajiid sihke vuosttaš- ja nuppiluohkkálaččaide boahtte jagi stáhtabušeahtas, dadjá stáhtaministtar Jonas Gahr Støre (Bb).

-Dat lea historjjálaš viiddideapmi oktasašskuvllas. Dál go maiddái nuppiluohkkálaččat ožžot 12 diibmosaš nuvttá SAÁF-saji čavčča rájes, de dat lea mielde geahpedeamen sosiála erohusaid. Lea dehálaš ahte buot mánát besset geavahit fálaldaga, ja ahte váhnemat besset searvat bargoeallimii, dadjá máhttoministtar Tonje Brenna (Bb).

Stuorimus lassáneapmi Agderis

SAÁF-geavaheddjiid lohku lea lassánan buot fylkkain. Lassáneapmi lea stuorimus Agder fylkkas, olles 15 proseantačuoggá, ja Innlandet fylkkas lea lassáneapmi nubbin stuorimus, 13 proseantačuoggá eanet go diibmá. Oslos ožžot almmatge eanaš  mánát SAÁF-saji, olles 97 proseantta buot vuosttašluohkkálaččain (geahča govvosa vuollelis).

Hattiid vuolideami lassin, áigu ráđđehus maiddái buoridit kvalitehta skuvlaastoáiggeortnegis. Ráđđehus áigu joatkit bargat nationála rámmaplánain mii ásahuvvui čakčat 2021, ja háliida nannet bargiid gelbbolašvuođa buoridan dihte  SAÁF kvalitehta. 2023 stáhtabušeahtas várrejuvvo 10 miljovnna ruvnnu ovddidit gelbbolašvuođafálaldagaid SAÁF-bargiide. 

Diehtun:

• Jagi 2023 geavaha ráđđehus 1,4 miljárdda kruvnnu vai vuosttašluohkkálaččat ožžot nuvttá fálaldaga, ja 700 miljovnna geavahuvvo viiddidit fálaldaga nuppiluohkkálaččaide.
• Haddi lea dehálaš SAÁF-sajiid geavaheapmái. Skuvlaastoáiggeortnega 2018 árvvoštallamis vástidedje goalmmátoassi olbmuin ahte SAÁF ii geavahuvvo hatti geažil.  
• Eanaš SAÁF oassesajit leat sullii 12 diimmu vahkus, ja oassesajit leat leamaš  nuvttá buot vuosttašluohkkálaččaide čavčča rájes.
• SAÁF-sadjemáksu mearriduvvo báikkálaš dásis. Oassesadji máksá gaskamearálaččat 1820 kruvnnu mánnui, ja ollessadji máksá gaskamearálaččat 1 870 kruvnnu mánnui.
• Olles riikkas leat dál oktiibuot 165 000 máná skuvllaid astoáiggefálaldagas.  Dat lea 8 proseantta eanet go čakčat 2021, ja dalle lei lohku 153 000 máná.   
• Oahpahusdirektoráhta loguid beasat lohkat dáppe: udir.no