Buoret čálgoortnegiid - čielggada sierra ráđđeaddibálvalusa

Šiehtadallit, stáda ja NBR, leat ovttaoaivilis ahte dárbbašuvvo boazodoallofágalaš ráđđeaddin, ja ahte danne ferte dál čađahit guorahallama gávnnahan dihte movt dákkár bálvalus galgá hábmejuvvot boahtteáiggis.

2019:s árvvoštalai NIBIO boazodoalu almmolaš hálddašeami nuppástuhttima mii dahkkui 2014:s. Nuppástuhttin mielddisbuvttii ahte ovddeš guovllustivrraid doaimmat sirdojuvvojedje davimus fylkkaid stáhtahálddašeaddjái. Seamma jagi ásahuvvui Eanandoallodirektoráhta.

Váilevašvuohta

NIBIO raporttas čujuhuvvui dasa ahte maŋŋil go almmolaš hálddašeami rievdadedje, de lea ráđđeaddin- ja bálvalusdoaimmain čuožžilan váilevašvuohta. Daid doaimmaid maid almmolaš boazodoallohálddahus loahpahii 2014:s, galge orohagat čuovvulit, muhto dasa eai leat leamaš resurssat. Raportta loahppaárvvoštallamis bođii ovdán ahte dárbbašuvvo boazodoallofágalaš ráđđeaddin. Dan sáhttá dahkat juogo dan bokte ahte nannet orohagaid návccaid fuolahit daid doaimmaid, dahje ásahit ráđđeaddibálvalusa, mii ii leat čadnon boazodoallohálddahussii, addin dihte orohagaide gelbbolašvuođadoarjaga.

Čielggadeamis mii dál čađahuvvo galgá earret eará boahtit ovdan guđiid fágasurggiid lea dárbu gokčat, ja movt ráđđeaddibálvalus galgá organiserejuvvot. Čielggadeapmi galgá maid sisttisdoallat árvvoštallama das movt ráđđeaddinovttadat sáhttá hálddašit boazodoalu doarjaga sadjásaččaide ja sadjásašortnega. Eanandoallodirektoráhta almmuha čielggadanbarggu ja čielggadeapmi galgá leat gárvvis juovlamánu 1. b. 2024 rádjai.

– Boazodoallu dárbbaša iešguđetlágan ráđđeaddima, iešguđet fágasurggiin, ja mun anán ahte ráđđeaddibálvalusa čielggadeapmi boazodoalu várás lea dehálaš vuođđun Boazodoallošiehtadusa 2025/2026 šiehtadallamiidda, dadjá eanandoallo- ja biebmoministtar Geir Pollestad (GB).

Sadjásaččat boazodoalus

Dál lea boazodoalus vejolašvuohta oažžut doarjaga sadjásažžii buozanvuođa oktavuođas, mii juolluduvvo orohagaide ja boazoservviide, ja maiddái sadjásaččaide áhpehisvuođa, riegádahttima, adopšuvnna ja jápmima oktavuođas sierra doarjjaortnega bokte. Sadjásačča vejolašvuohta lea dieđusge dan duohken ahte gávdnojit sadjásaččat geain lea gelbbolašvuohta, ii dušše boazodoalu birra, muhto máhttu dan siidda birra gosa lea dárbu sadjásaččaide.

Šiehtadallit leat Boazodoallošiehtadusas 2024/2025 soahpan lasihit orohatdoarjaga earret eará dasa ahte láhčit dili nu ahte sadjásačča sáhttá bálkáhit buozanvuođa geažil.

Lassi árrapenšuvdnamáksomearri boazodoalus

Boazodoallošiehtadusas 2024/2025 leat šiehtadallit lasihan árrapenšuvdnamáksomeari boazodoalus. Árrapenšuvdnaortnet galgá addit boazodolliide vejolašvuođa heaitit ealáhusas ovdal go sis lea vuoigatvuohta álbmotoaju ahkepenšuvdnii, ja galgá movttiidahttit dasa ahte boazolohku ja barggolašvuođastruktuvra heivehuvvo ealáhusa resursa- ja dienasvuđđui.

– Lea dehálaš ahte boazodoalus láhččojuvvo dilli njuovžilis buolvamolsumiidda. Oažžut ođđa návccaid siidaoassejođiheaddjin, sáhttá veahkehit dasa ahte dat dárbbašlaš máhttu, mii boarrásit boazobargiin lea, fievrreduvvo viidáseappot, muhto maiddái dasa ahte oažžut ođđa gelbbolašvuođa ealáhussii. Árrapenšuvnna máksomeriid lasiheapmi dagaha ortnega eanet geasuheaddjin ja movttiidahttá árat buolvamolsumiidda, dadjá eanandoallo- ja biebmoministtar Geir Pollestad.