Bargu ođđa girjelágain lea dál jođus
Preassadieđáhus | Nr: 122-21 | Almmustahtton: 22.10.2021 | Kultur- ja dásseárvodepartemeanta
– Máŋggabealat girjjálašvuohta galgá leat olámuttus olles riikka álbmogii. Ráđđehus háliida danne ovddidit ođđa girjelága sihkkarasit einnostahttivuođa, viidodaga ja kvalitehta, dadjá kultur- ja dásseárvoministtar Anette Trettebergstuen. Ovdal láhkabarggu álggahuvvo guorahallanbargu maid nationálabibliotekára Aslak Sira Myhre galgá jođihit.
Ráđđehus čállá Hurdalsoahpamušas ahte sii áigot ovddidit girjelága mii sihkkarastá fástahaddevuogádaga. Girjemárkan lea rievdan ollu jagi 2013 láhkaevttohusa rájes, earret eará rávdnjejuvvojit ollu girjjit dahje almmuhuvvojit jiena bokte. Danne lea dárbu ođasmahttit máhttovuođu ovdal go ođđa láhkaevttohus sáddejuvvo gulaskuddamii. Lea maid dárbu geahčadit girjjálašvuođapolitihkalaš váikkuhangaskaoapmeapparáhta ollislaččat. Danne álggahuvvo guorahallanbargu árvvoštallat maid girjeláhka galgá sisttisdoallat, ja doaimmaid mat eai gáibit láhkarievdadeami.
– Girjjálašvuohta lea čoavdda kritihkalaš jurddašeapmái, ovdáneapmái ja buriid vásáhusaide. Dat sáhttá buktit áddejumi ja ipmárdusa mii nanne vejolašvuođa searvat servodahkii ja dahkat iežas válljejumiid. Danne lea dehálaš ahte buorre girjjálašvuohta buvttaduvvo mii buohkaide lea olámuttus. Lean ilus go dál beasan muitalit ahte mii dál álggahat guorahallanbarggu čuovvovaš láhkaproseassain nu ahte mii nu johtilit go vejolaš sáhttit evttohit ođđa girjelága Stuoradiggái, dadjá kultur- ja dásseárvoministtar Anette Trettebergstuen.
– Ođasmahttojuvvon girjeláhka ja váikkuhangaskaoapmeapparáhta mii lea heivehuvvon dálá girjemárkanii lea mearrideaddjin sihkkarastit girjjálašvuođa, lohkama ja buori girjerádjofálaldaga boahtteáiggis. Mun illudan go beasan leat mielde huksemin norgga girjjálašvuođavuogádahkii buori vuođu čuovvovaš logijahkái, dadjá nationálabibliotekára Aslak Sira Myhre.
Departemeanta áigu girjesuorggi iešguđet aktevrraid searvadahttit čoahkkimiid bokte ja addit sidjiide vejolašvuođa buktit čálalaš evttohusaid guorahallanbarggu oktavuođas.