Oahppanbiras ja givssideapmi

"Oahppanbirrasiin" oaivvildit mii kultuvrralaš, relašuvnnalaš ja fysalaš oktavuođaid skuvllas ja mánáidgárddis mas lea mearkkašupmi mánáid ja ohppiid oahppamii, dearvvašvuhtii ja loaktimii.

Doaibmabijut ovddidit oadjebas ja buori mánáidgárde- ja skuvlabirrasa

Gávdnojit moanat doaibmabijut movt ovddidit oadjebas ja buriid mánáidgárde- ja skuvlabirrasiid ja fuomášit ja bissehit givssideami. Deháleamos doaibmabijuid sáhttá čatnat viđa váldosuorgái:

1. Lassi gelbbolašvuođa mánáidgárddiide, skuvllaide, eiseválddiide ja eaiggádiidda geat dárbbašit ja háliidit doarjaga vai máhttet buorebut hukset oadjebas ja buriid mánáidgárde- ja skuvlabirrasiid ja eastadit, fuomášit ja gieđahallat givssideami.
2. Njuolggadus ohppiid skuvlabirrasa birra (kapihtal 9 A oahpahuslágas) rievdaduvvui ja fápmuibiddjojuvvui borgemánu 1. b. 2017.
3. Ođđajagimánu 1. b. rájes gustojit ođđa njuolggadusat oadjebas ja buori psykososiála mánáidgárdebirrasa birra mánáidgárdelágas kapihtal 8.
4. Givssidanáittardeaddji buot fylkkain. Áittardeaddjit galget earret eará doarjut ja bagadallat mánáid, ohppiid ja váhnemiid psykososiála birrasa birra mánáidgárddiin ja skuvllain. Sii galget bargat eastademiin ja fágaid rastá, juohkit dieđuid ja oahpahit ja veahkkin gávdnat buriid ja bistevaš čovdosiid mat sihkkarastet oadjebas ja buori mánáidgárde- ja skuvlabirrasa. 
5. Veahkki ja doarjja mánáide ja nuoraide guđet vásihit givssideami, ja sin bearrašiidda. Mánáidáittardeaddji, neahttasiiddut ja iešguđetlágan organisašuvnnat ožžot ekonomalaš doarjaga bargat dainna ahte eastadit givssideami ja veahkkin ráhkadit buriid oahppanbirrasiid.

Nannoset gelbbolašvuohta

Buot stuorimus doaibmabidju lea nannet rávisolbmuid gelbbolašvuođa bargat oadjebas ja buriid mánáidgárde- ja skuvlabirrasiiguin gos buohkat leat mielde dan sosiála searvevuođas. Oahppodirektoráhta neahttasiidduin leat dat iešguđetge gelbbolašvuođadoaibmabijut čilgejuvvon dárkileappot: 

Barnehage- og skolemiljø (mánáidgárde- ja skuvlabiras) (udir.no) ja Kompetansepakker om barnehage og skolemiljø (Gelbbolašvuođapáhkát mánáidgárde- ja skuvlabirrasa birra) (udir.no).