Ovttasbargoráđđehusa ruhtajuolludusat sierra sámi ulbmiliidda evttohuvvojit 624,6 miljovnna kruvdnui jagis 2006, mii jagis 2005 lei 598,3 miljovnna kruvnno.

Dan rájes go Ovttasbargoráđđehus doaibmagođii jagis 2001 de leat oppalaččat ruhtajuolludusat sierra sámi ulbmiliidda lassánan sullii 138 miljovnna kruvnno, dat lea 28,3 proseantta lassáneapmi. Lassáneamis lea maid mielde 10 miljovnna kruvnno álgoruhtan sámi dieđavissui Guovdageidnui. – Sámeministtarin mun lean hui duhtavaš go Ovttasbargoráđđehus lea fuolahan mearkkašáhtti lassáneami dán suorgái. Lasáhusain lea Ráđđehus čájehan ahte lea čuovvolan áigumušaidis ahte nannet sámi giela, kultuvrra ja ealáhusaid, dadjá gielda- ja guovloministtar Erna Solberg.

Sámediggi oažžu juohke jagi doarjaga Gielda- ja guovlodepartemeanttas, Oahpahus- ja dutkandepartemeanttas, Mánáid- ja bearašdepartemeanttas, Kultur- ja girkodepartemeanttas, Birasgáhttendepartemeanttas, Eanandoallo- ja biebmodepartemeanttas ja Dearvvašvuođa- ja fuolahusdepartemeanttas. Sámedikki ollislaš ruhtajuolludus 2006' bušeahttajahkái lea birrasiid 250 miljovnna kruvnno.

Gielda- ja guovlodepartemeantta bušeahtas evttohuvvo ruhtajuolludusa lasihit Sámediggái 16,6 miljovnna kruvnnuin jagis 2006 gitta 155,35 miljovnna kruvdnui. Lassáneapmi boahtá eanas dan dihte go 7 miljovnna kruvdno, mii addui Sámediggái jagiin 2004 ja 2005 nannet guovttegielalašvuođabarggu, biddjojuvvo Sámedikki rámmii 2006' rájes. Lea maid biddjon 3 miljovnna kruvnno lassáneapmi sámi girjebussiide ja 2 miljovnna kruvnno dan dihte go Sámediggi lea viiddidan Sámi ovddidanfoandda doaibmaguovllu.

Sámedikki bušeahtta lea nannejuvvon birrasiid 93 miljovnna kruvnnuin Ovttasbargoráđđehusa áiggis. Dát doarju mihttomeari ahte Sámedikkis galgá leat eambbo dadjamuš ja fápmu áššiin mat gusket sámi álbmogii erenoamážit.

Sámi oahpahus lea Ráđđehusas okta dain deháleamos sámepolitihkalaš nannensurggiin. Ráđđehus evttoha Oahpahus- ja dutkandepartemeantta bušeahtas lasihit ruhtajuolludusa sámi vuođđooahpahussii 6,4 miljovnna kruvnnuin 46,7 miljovnna kruvdnui. Doarjjaortnet galgá váikkuhit vai nannejuvvo oahpahus sámegielas ja sámegillii ja nannet oahpaheddjiid gelbbolašvuođa.

Oassin Kunnskapsløftet (gealbolokten-barggus) ráhkaduvvojit ođđa oahppoplánat oahpahussii sámegielas ja sámegillii. Oahppoplánat galget váldojuvvot atnui 2006-2007 skuvlajagis. Oahpahusdirektoráhtta ovttasbargá Sámedikkiin ja Sámediggái juolluduvvo birrasiid 2 miljovnna kruvdno nannet dán barggu jagis 2006.

Sámi allaskuvlii juolluduvvo 35 miljovnna kruvdno jagis 2006. Ruhtajuolludus lea lasihuvvon 1,2 miljovnna kruvnnuin Sámi instituhta doaimmahussii.

Dearvvašvuođa- ja fuolahusdepartemeanta joatká plánain ahte buoridit psyhkalaš dearvvašvuođagáhttema Kárášjogas ja Leavnnjas nu ahte doppe huksejuvvojit našovnnalaš gelbbolašvuođaguovddážat mat addet bálvalusaid sámi álbmoga várás. Vuoruhuvvon doaimmat leat ahte hukset bearašossodaga ja akuhttasajiid nuoraid várás. Ruhtajuolludus jahkái 2006 evttohuvvo lasihuvvot sullii 22,5 miljovnna kruvdnui, mii jagis 2005 lei 18 miljovnna kruvnno.

Bajilgovva –juolludusat sámi ulbmiliidda (1000 kruvdno):

Juolluduvvo maiddái ruhta sámi ulbmiliidda kapihtaliin ja ruhtapoasttain maid ii sáhte velá dárkilastit.

Loga diehtočállosa ”Bevilgninger til samiske formål i statsbudsjettet 2006” (H-2179).

Gielda- ja guovlodepartemeantta preassatelefovdna: 22 24 25 00.