Ruhtajuolludeapmi sámi doaimmaide evttohuvvo lasihuvvot 19 miljovnnain ruvnnuin jagi 2004, ja das galgá 17 miljovdna Sámedikki bušehttii. – Ráđđehus lea boahtte jahkái ollu lasihan juolludeami dan suorggis, dadjá stádaráđđi Erna Solberg.

Ráđđehusa juolludeapmi earenoamáš sámi doaimmaide evttohuvvo sullii 541 miljovnna ruvdnui jahkái 2004, ja jagi 2003 lei salderejuvvon bušeahtas sullii 522 miljovnna ruvnno. – Dán bušeahtas ráđđehus vuoruha nannet sámegiela oahpu ja sámi mánáidgárddiid, dadjá Solberg.

Sámediggi oažžu maid jahkásaččat ruhtajuolludemiid máŋgga departemeanttas. Oktiibuot evttohuvvo 227 miljovnna juolludeapmi Sámediggái jahkái 2004, ja jagi 2003 lei dat supmi 210 miljovnna. Lassáneapmi lea 8,1 proseantta.

Gielda- ja guovludepartemeantta bušeahta bokte evttohuvvo ruhtajuolludeapmi sámi doaimmaide lasihuvvot 9,3 proseanttain jagi 2003 ektui. Rápma Sámediggái lasihuvvo 12,6 miljovnna ruvnnuin 142,4 miljovnna rádjái. Dat sisttisdoallá 7 miljovnna ruvnno lassáneami sámegiela hálddašanguovllu guovttegielalašvuođa bargui.

Dainna juolludemiin lea ráđđehus ollásit deavdán daid dárbbuid mat bohte ovdan raporttas ”Suohkaniid ja fylkkasuohkaniid golut guovttegielalašvuhtii” mii almmuhuvvui 2002:s.

Gielda- ja guovludepartemeanta maid lasiha ruhtajuolludeami Álgoálbmotvuoigatvuođaid gelbbolašvuođaguovddážii Guovdageidnui 50 000 ruvnnuin, nu ahte ollislaš juolludeapmi šaddá 3 150 000 ruvnno.

Stuoradikkedieđáhusa čuovvolan dihte sámi alit oahpu ja dutkama birra, lasiha Ráđđehus Sámi allaskuvlla duodjeoahpu nannemii gitta 500 000 ruvnno rádjái Oahppo- ja dutkandepartemeantta bušeahta bokte. Muđui de lea evttohuvvon Sámi allaskuvlii juolluduvvot 900 000 ruvnno mii galgá nannet fágalaš ovdáneami sámi gielas ja dahkat vejolažžan bidjat olbmo bargui hálddahuslaš virgái mii galgá bargat rekrutteremiin. Lea boahtán positiiva evalueren sámi jouranlistaoahpus ja dat lea duogážin dasa ahte allaskuvla oažžu ođđa ruđaid joatkit oahppofálaldagain bistevaš dásis 2003 čavčča rájes.

Buorit mánáidgárdefáladagat mat leat vuođđuduvvon sámi gillii ja kultuvrii leat dehálaččat máná identitehta huksemii oadjebas birrasis. Ráđđehus evttoha danne ahte juolludeapmi sámi mánáidgárddiide MBD bušeahta badjel, maid Sámediggi hálddaša, nannejuvvo 2 miljovnna ruvnnuin jagi 2004:s, ja de lea olles 27,4 proseantta lassáneapmi. Earenoamáš juolludeamit sámi dearvvašvuhtii ja kultuvrii doalahuvvojit sullii seamma dásis go dán jagi. Ráđđehus evttoha maid lassáneami 300 000 ruvnnuin čájáhusmáksun sámi dáiddáriidda Kultur- ja girkodepartemeantta bušeahta bokte.

- Sámi servodat ja máŋggat sámi ásahusat leat ain ceggema dásis. – Go galgá buoret dili láhčit sámi gillii, kultuvrii ja ealáhuseallimii, de Ráđđehus lea atnán dárbbašlažžan lasihit doarjagiid sámi doaimmaide, dadjá stádaráđđi Solberg.

Geahča almmuhuvvon čállosa ” Juolludeamit sámi doaimmaide jagi 2004” (H-22/03).