Utdannings- og forskingsdepartementet sitt budsjett for 2006:

Kraftig satsing på utdanning og forsking

Regjeringa foreslår å løyve 1,6 milliardar kroner til å gjennomføre Kunnskapsløftet i 2006. 600 millionar kroner av det skal brukast til kompetanseutvikling for lærarar og skuleleiarar. Regjeringa satsar òg sterkt på forsking og foreslår ein samla vekst i løyvingane til det på 1,4 milliardar kroner. I tillegg foreslår Regjeringa å auke kapitalen i fondet for forsking og nyskaping med 39 milliardar kroner til 75 milliardar kroner.

I samband med Kunnskapsløftet ønskjer Regjeringa å løyve 400 millionar kroner til å dekkje kommunale kostnader til nye læremiddel i grunnskulen. Vidare er det gjort framlegg om å auke rammetilskotet til kommunane med 190 millionar kroner for å finansiere heilårsverknaden av timetalsutvidinga som blei innført i grunnskulen frå hausten 2005. Å utvikle nye læreplanar er eit anna prioritert tiltak i reforma. Det blir foreslått å løyve 80 millionar kroner til arbeidet med å ferdigstille dei resterande læreplanane i 2006.

For å styrkje rekrutteringa av forskarar foreslår Regjeringa å løyve 132 millionar kroner til dei 100 nye doktorgradsstillingane som blei oppretta frå hausten 2005, og til å opprette 350 nye doktorgradsstillingar frå hausten 2006.[JOH1] Løyvingane til grunnforsking gjennom Forskingsrådet over budsjettet til Utdannings- og forskingsdepartementet er styrkte med over 250 millionar kroner. Kapitalauken i fondet for forsking og nyskaping gir ei auka avkasting i 2007 på rundt 1,4 milliardar kroner. Over områda til andre departement foreslår Regjeringa ein særleg sterk auke i løyvingane til næringsretta forsking.[JOH2]

Andre viktige saker i budsjettforslaget:

• Kvalitetsreforma i høgare utdanning: Kvalitetsreforma blei fullfinansiert med ei løyving på 1 144 millionar kroner i 2004. Løyvingsnivået blei halde oppe i 2005, og no foreslår Regjeringa å føre det vidare og gjere det permanent. Samtidig blir budsjetta til universiteta og høgskulane styrkte med 156 millionar kroner som følgje av at talet på avlagde studiepoeng aukar.
• Bygg i universitets- og høgskulesektoren: Regjeringa foreslår å gi 40 millionar kroner i starttilskot til to nye byggjeprosjekt i universitets- og høgskulesektoren – 30 millionar kroner til rehabilitering av Sørhellingabygget ved Universitetet for miljø- og biovitskap og 10 millionar kroner til nybyggprosjektet Samisk vitskapsbygg i Kautokeino. Det er vidare gjort framlegg om å løyve 75 millionar kroner til å vidareføre byggjeprosjektet ved Institutt for informatikk (IFI II) ved Universitetet i Oslo og 55 millionar kroner til å vidareføre samlokaliseringa ved Høgskolen i Vestfold. Budsjettet inneheld i tillegg forslag om 172 millionar kroner i utstyrs- og husleigemiddel til bygg som blir ferdigstilte i 2006.
• Nettinfrastruktur: For å byggje ut nettinfrastrukturen ved norske forskingsinstitusjonar foreslår Regjeringa å løyve 12,6 millionar kroner til Gigacampus-prosjektet. Prosjektet skal gi standardisert opprusting av den lokale campusinfrastrukturen og den lokale IKT-kompetansen ved institusjonane.
• Modernisering av Lånekassa: Regjeringa foreslår å gi 93,5 millionar kroner i starttilskot til moderniseringsprosjektet i Lånekassa. Det skal sikre raskare og tryggare saksgang og eit godt servicenivå. I moderniseringsperioden foreslår Regjeringa å styrkje administrasjonsbudsjettet i Lånekassa med 11 millionar kroner.
• Auka basisstøtte frå Lånekassa: Regjeringa foreslår å auke basisstøtta til elevar og studentar frå 8 000 kroner per månad til 8 140 kroner per månad. Auken gjeld ikkje unge elevar i ordinær vidaregåande opplæring.
• Utvida lånerett for elevar og studentar ved private lærestader: Regjeringa foreslår å auke låneretten i Lånekassa til å dekkje skulepengar for elevar og studentar ved private lærestader frå 20 860 kroner til 50 000 kroner per undervisningsår. Auken gjeld ikkje unge elevar i ordinær vidaregåande opplæring.
• Kompetansepolitikken: For å sikre at fleire vaksne får tilstrekkeleg kunnskap i lesing, skriving, rekning og IKT til å meistre utfordringar i arbeids- og samfunnslivet, foreslår Regjeringa å løyve 15 millionar kroner for å opprette programmet «Ny sjanse!». Det tidlegare kompetanseutviklingsprogrammet blir foreslått avvikla frå 2006.
• Studieforbund: For å skaffe rom for andre tiltak foreslår Regjeringa å redusere tilskotet til studieforbund med 54 millionar kroner.
• Skuleanlegg: For å gjere skuleeigarane i stand til å satse vidare på å ruste opp skuleanlegg foreslår Regjeringa å styrkje tilskotsordninga der staten gir rentekompensasjon for investeringar i nybygg og rehabilitering av skuleanlegg. Det blir foreslått å auke investeringsramma med 2 milliardar kroner til 12 milliardar kroner i 2006. Med det ligg framdrifta godt framom den vedtekne totalramma på 15 milliardar kroner[JOH3] fordelt på åtte år, og til no har over 1000 skular nytt godt av ordninga. Tilskotet blir løyvt over budsjettet til Kommunal- og regionaldepartementet.

Budsjettforslag etter kategori
Forslaget frå Utdannings- og forskingsdepartementets til budsjett for 2006 er på om lag 96,3 milliardar kroner. Slik er fordelinga på dei ulike kategoriane: