- Det arbeidet som er gjort i innlandsfylka Hedmark og Oppland gjennom prosjektet Innlandet 2010 kan vere eit førebilete også for andre delar av landet. Det er eit godt døme på regional utvikling, og tiltak som skaper auka vekst gjennom ein god dialog mellom regionale og sentrale styresmakter, seier landbruks- og matminister Lars Sponheim.

Landbruks- og matdepartementet har ansvaret for Innlandet 2010 som er eitt av ni prosjekt i Regjeringa si sektoroverbyggjande satsing på innovasjon. Innlandet 2010 femner om fylka Hedmark og Oppland, og har som mål å auke nyskapinga og bedriftsetableringa i dei delane av landet som i mindre grad har teke del i den auka verdiskapinga langs kysten.

Eit utviklingsråd med eit fleirtal av representantar frå næringslivet i innlandet greidde våren 2005 ut potensialet for nyskaping i innlandet. Utviklingsrådet tilrår ei målretta satsing innanfor handlingsområda industri, bioteknologi, bioenergi, reiseliv, kultur og oppleving og informasjonstryggleik. Utgreiinga viser òg til landbruket si viktige rolle som produsent av råvarer og kulturlandskap. Det regionale næringslivet, kompetansemiljøa og den offentlege forvaltninga i innlandet arbeider med å løyse dei fleste utfordringane i utgreiinga.

Løyvinga på 20 mill. kroner skal nyttast innan skog- og næringsmiddelindustri, bioteknologi, bioenergi og reiseliv. Tidlegare er det løyvd 10 mill. kroner til ulike prosjekt, og 10 mill. kroner til eit fem-årig seterprosjekt i samarbeid med Møre og Romsdal.