Dette er hovudpunkt i Landbruks- og matdepartementet sitt budsjettforslag for 2006. Budsjettet er i sum på 13,653 milliarder kroner.

- Dette er eit budsjett med klare prioriteringar. Vi aukar løyvingane til forsking og utvikling innan landbruks- og matsektoren sju prosent og vil slår saman fleire kunnskapsinstitusjonar. Det er og gledeleg at effektiviseringsvinsten ved etableringa av det nye Mattilsynet no kjem brukarane til gode i form av lågare avgifter. Ikkje minst gjeld det dei minste verksemdene, seier landbruks- og matminister Lars Sponheim.

Reduserte matavgifter
Det blir gjort framlegg om å redusere satsane for avgifter for Mattilsynet med seks prosent. Dei samla inntektene til Mattilsynet vil bli redusert med om lag 50 mill. kroner. Det blir m.a. innført ei øvre grense for kjøttkontrollgebyret, slik at dette ikkje kan vere meir enn 100 øre pr. kg kjøtt. Dette vil slå sterkast ut for mindre verksemder. For ein del av desse vil avgiftene bli bortimot halvert.

Forsking og utvikling
Det blir gjort framlegg om å auke løyvinga på dette feltet med 22 mill. kroner til 326 mill. kroner. I 2006 vil det bli starta opp tre nye store forskingsprogram: Norsk mat frå sjø og land, Næringsutvikling basert på arealressursane og Treprodukter - frå marknad til skogbruk. Det er sett av fem mill. kroner til program for kommersialisering av FoU-resultat (FORNY). Landbruks- og matdepartementet gjer framlegg om å auke løyvinga til internasjonalt forskingssamarbeid med Nord-Amerika med fire mill. kroner.

Innlandet 2010
Regjeringa vil følgje opp arbeidet med Innlandet 2010 med 20 mill. kroner i 2006, og ser arbeidet som eit godt døme på regional utvikling, og eit tiltak som skaper auka vekst gjennom ein god dialog mellom regionale og sentrale styresmakter. Innlandet 2010 er eitt av ni prosjekt i Regjeringa si sektoroverbyggjande satsing på innovasjon, og femner om fylka Hedmark og Oppland.

Slår saman kunnskapsinstitusjonar
Regjeringa har sett i gang fleire tiltak for å modernisere kunnskapsinstitusjonane på landbruks- og matområdet.

Regjeringa vil etablere Bioforsk som eit forvaltingsorgan med særskilde fullmakter frå 1. januar 2006. Utgangspunktet er at Jordforsk, NORSØK og Planteforsk skal inngå i den nye verksemda.

Regjeringa meiner at Norsk institutt for skogforsking (Skogforsk) og Norsk institutt for jord- og skogkartlegging (NIJOS) bør bli slått saman til ein ny kunnskapsorganisasjon for arealresursar innan områda skog, jord, landskap og utmark.

Det blir arbeidd med å omstrukturere forskingsinstitutta innanfor den blå-grønne sektoren.

NOFIMA AS (Norsk Fiskeri- og Matforskning AS) vart etablert i 2005 for å førebu etableringa av eit holdingsselskap for den næringsretta FoU-verksemda med tre dotterselskap frå 1. januar 2007.

Andre punkt

• Naturskade: Det er gjort framlegg om å auke løyvinga til sikringstiltak med 15 mill. kroner til 23 mill. kroner, m.a. for å gjennomføre overvakings- og sikringstiltak i Åkneset i Stranda kommune. Landbruks- og matdepartementet leiar ei interdepartemental arbeidsgruppe som skal skaffe fram grunnlagsmateriale for å kunne ta stilling til omfanget av behovet for statleg engasjement når det gjeld store fjellskred.

• Reindrift: Å få talet på rein i balanse med beitegrunnlaget har høgste prioritet også i 2006. Marknadstilhøva for reinkjøtt har betra seg mykje. Arbeid med ny reindriftslov er prioritert.
• Norsk utmark SF: Statskog SF skifter namn til Norsk utmark SF. Dette er den største grunneigaren i Noreg, og namneendringa skal signalisere at areala kan nyttast av borgarane til jakt og fiske og anna friluftsliv.
• Jordskifte: I samband med at administrasjonen av jordskifterettane frå 1. januar 2006 blir overført frå Landbruks- og matdepartementet til Justisdepartementet blir Domstolsadministrasjonen i Trondheim tilført 11 årsverk.
• Jordskiftesenter på Agatunet: Regjeringa foreslår å løyve ein mill. kroner til etablering av eit jordskiftesenter på garden Aga i Hardanger.
• Genressurssenter: Regjeringa foreslår å etablere Norsk genressurssenter på Ås.
• Frølager: Det blir foreslått å etablere eit globalt sikringslager for frø på Svalbard.

Utgifter fordelte på kapittel: