Dansens Hus blir realisert gjennom eit driftstilskot på 11,1 millionar kroner. Dette er ei auke på 5,1 millionar kroner frå 2005. - Vi ser no tydelege resultat av regjeringas satsing på dansefeltet, seier kultur- og kyrkjeministeren.

- Regjeringa har i desse fire åra satsa på sterkare profilering av dans som kunstart. Eg er derfor glad for å realisera Dansens Hus, som har så høg prioritet i dansemiljøet, seier kultur- og kyrkjeminister Valgerd Svarstad Haugland.

Tilskotet til Dansens Hus skal dekkja husleige og drift, i tillegg til kostnader ved kjøp av teknisk utstyr og inventar til nye lokale. Dansens Hus arbeider med å realisera permanente lokale for verksemda i løpet av 2006. For tida har Dansens Hus drift med regelmessige danseframsyningar i ulike mellombels lokale i Oslo, mellom anna på Kunsthøgskolen.

Departementet foreslår eit tilskot til Stellaris Dans Teater i Hammerfest på 1 050 000 kroner. Dette er ein auke på vel 0,5 millionar kroner og er ledd i ei oppbygging som nordnorsk landsdelsscene for dans.

Tilskotet til Senter for Dansekunst, Scenehuset og Gratis Daglig Trening er auka.

Tilskotet til fri scenekunst under Norsk kulturråd er i 2006 foreslått auka med 5 millionar kroner, som skal gå til frie grupper innanfor musikk, dans og teater.