Kultur- og kyrkjedepartementet foreslår 16,2 millionar kroner i driftstilskot til Nobels Fredssenter. – Dette styrkar Noreg si profilering som fredsnasjon, seier kultur- og kyrkjeminister Valgerd Svarstad Haugland. Fredssenteret vil opna for publikum 11. juni 2005.

Nobels Fredssenter vil innehalda ei permanent utstilling over alle fredsprisvinnarane. I tillegg vil senteret gjennom dokumentasjon, utstillingar, førelesingar, konferansar og andre aktivitetar for barn og vaksne formidla informasjon om Alfred Nobel, Nobels Fredspris og aktuelle konfliktar og internasjonal fredsinnsats.

Statsbygg står for ombygging og rehabilitering av den tidlegare stasjonsbygningen på Vestbanen til bruk for Nobels Fredssenter. Fredssenteret skal leiga bygningen av Statsbygg. Kultur- og kyrkjedepartementet gjer framlegg om til saman 16,2 millionar kroner i tilskot til å dekkja leigekostnader og andre driftskostnader.