Regjeringa opnar fleire vegar til lærarutdanning

Søkartala til lærarutdanningane har falle kraftig fleire år på rad. Trass i lærarmangel mange stader, stod meir enn éin av tre lærarstudieplassar tomme i haust.

– Å satse på lærarar er noko av det viktigaste vi gjer for barn og unge. Vi ser at heile Noreg har behov for fleire dyktige lærarar, og behova er særleg store i distrikta. Derfor opnar vi no fleire vegar inn i lærarutdanninga, seier forskings- og høgare utdanningsminister Oddmund Hoel (Sp).

Profesjonsmeldinga blir behandla i Stortinget i dag

I april la regjeringa fram to meldingar om høgare utdanning for Stortinget: profesjonsmeldinga og opptaksmeldinga. I dag blir profesjonsmeldinga behandla i Stortinget. Innstillinga frå Utdannings- og forskingskomiteen viser at fleirtalet støtter dei fleste forslaga i profesjonsmeldinga. Opptaksmeldinga blir behandla i Stortinget 5. juni. 

– Dei femårige, integrerte lærarutdanningane skal framleis vere hovudvegen til å bli lærar. Men no må vi tenke nytt, og vi må handle raskt. Eg er glad fleirtalet støttar forslaga våre. Dei nye modellane skal vere eit viktig supplement for å nå endå fleire, som elles ikkje ville valt lærarutdanning, seier Hoel.

Regjeringa har innvilga to ulike forsøksordningar

Integrert master og PPU

Då det i 2019 vart innført eit masterkrav for opptak til PPU, gjekk søkinga til læraryrket dramatisk ned over heile landet. I profesjonsmeldinga foreslår regjeringa å opne for ein integrert master i PPU som gir dei med bachelorgrad høve til å bli lærarar med mastergrad på to år – eitt år kortare enn i dag. Universitetet i Oslo ønska å prøve ut modellen alt frå hausten 2024. Dei har fått innvilga eit forsøk om ein slik PPU-master, og tilbyr 50 plassar allereie i haust.

– Det er gledeleg at Universitetet i Oslo allereie hadde over åtti søkarar fem dagar etter at opptaket blei opna. Det viser at det er eit potensial i ordningane som vi har foreslått i profesjonsmeldinga, seier Hoel.

Grunnskulelærarutdanning for 1.-10. trinn

I profesjonsmeldinga foreslår regjeringa å opne for forsøk med alternative organiseringar av grunnskulelærarutdanningane for å auke rekrutteringa. Små skular i distrikta treng lærarar med kompetanse som er betre tilpassa behova deira. No har Nord universitet fått innvilga eit  forsøk med ei samlingsbasert grunnskulelærarutdanning på Nesna med oppstart hausten 2025. Utdanninga skal gi kompetanse i opptil fem fag, og til å undervise på alle trinn i grunnskulen. Det vil gjere det lettare for kommunane å tilsette lærarar ved små skular.

– Dette er eit viktig pionerarbeid, og om det blir vellykka, vil desse erfaringane vere verdifulle i det vidare arbeidet med å tilpasse lærarutdanningane til behovet i distrikta, seier Hoel.