Noreg aukar støtta til fred og skogbevaring i Colombia

– Bevaring av regnskog bidreg til å redusere klimagassutslepp og bevare biomangfald. Det bidreg òg til å betre lokale levevilkår, som gir grunnlag for trygde, fred og tryggleik for folk, seier klima- og miljøminister Tore O. Sandvik.

Noreg deltok i går på eit arrangement som sat søkjelys på viktigheita av å sjå fredsinnsats og konfliktløysing i lys av klimaendringar og vern av miljøet. Arrangementet var ein del av naturtoppmøtet (COP 16) i Cali, Colombia. Under møtet blei det annonsert norsk støtte til eit prosjekt via FN sitt utviklingsprogram (UNDP) på totalt 130 millionar kroner. Målet er å jobbe for å skape fred i Colombia, samtidig som regnskogen blir verna.

– Få land kan seiast å ha ein så ambisiøs fredsdagsorden som Colombia, og tilsvarande ambisjonar for å verne skog og miljø. Eg er glad for at norsk støtte bidreg til å styrkje denne samanhengen, seier utanriksminister Espen Barth Eide.

Samarbeidet med UNDP reflekterer Noregs hovudprioriteringar i Colombia som skal støtte gjennomføringa av fredsavtalen frå 2016 og fredsdialogane med væpna grupper. Samtidig støtter Noreg innsatsen for å stanse avskoging og miljødegradering. Desse målsetjingane er i tråd med prioriteringane til den colombianske regjeringa.