Statsbudsjettet 2024
Historisk billig barnehage
Pressemelding | Dato: 06.10.2023 | Kunnskapsdepartementet
Regjeringa vil kutte maksprisen i barnehage til historisk låge 2000 kroner i månaden, og til 1500 kroner i dei 189 mest spreiddbygde kommunane.
Oppdatert fredag 6. oktober kl. 12:18 med lenke til oversikt over de 189 mest spredtbygde kommunene.
Det kjem fram i forslaget til statsbudsjett for 2024.
– Med lågare barnehagepris hjelper vi lommebøkene til mange familiar. Det gjer at fleire barn kan delta i barnehagefellesskapet, det gjer det lettare for fleire foreldre å jobbe og det er bra for samfunnet på kort og lang sikt. Barnehagen er viktig i barns liv her og no, og har betydning for korleis elevane gjer det vidare i skuleløpet, seier kunnskapsminister Tonje Brenna (Ap).
Regjeringa foreslår å løyve totalt 1,6 milliardar kroner til denne satsinga i 2024.
Sparer minst 11 000 årleg
Med ny makspris på 2000 kroner frå 1. august vil ein familie med eit barn i barnehage spare 11 000 kroner i året. Familiar med to barn i barnehage vil spare 18 700 kroner i året. Familiane til om lag 210 000 barn vil merke dette i lommebøkene.
I dei 189 mest spreiddbygde kommunane, der om lag 33 000 barn bur, vil ein makspris på 1500 kroner frå 1. august gjere at ein familie med eit barn i barnehage sparer 16 500 kroner i året. Dei med to barn i barnehage sparer 28 050 kroner.
– Den ekstra låge prisen i spreiddbygde kommunar kan gjere det endå meir attraktivt for småbarnsfamiliane å bu i distrikta, seier Brenna.
Om maksprisen frå Solberg-regjeringa i 2021-budsjettet hadde følgt prisveksten, ville den ha vore 3 610 kroner frå 2024.
Satsinga på lågare makspris kjem i tillegg til tidlegare tiltak som regjeringa har innført med gratis barnehage i Nord-Troms og Finnmark, og gratis barnehage frå tredje barn.
Vidareførar satsing på dei tilsette
Regjeringa er også oppteken av å styrke kompetansen til dei tilsette i barnehagane, og vil gjere det meir attraktivt å jobbe der. Til saman vil regjeringa bruke om lag 790 millionar kroner på å løfte kompetansen i 2024, ein auke på 84 prosent frå 2021. Regjeringa vil mellom anna vidareføre den store satsinga på vidareutdanning for barnehagelærarar og andre tilsette i barnehagane. I 2023 blei det sett ny rekord då 1700 barnehagelærarar fekk vidareutdanningstilbod, opp 70 prosent frå 2022. Regjeringa vil også gjere det mogleg for fleire assistentar å ta fagbrev på jobb, slik at det blir fleire barne- og ungdomsarbeidarar i alle barnehagar.
– Samfunnet vinn på at flest mogleg barn går i barnehage. Det gjer at barna klarer seg betre i skulen og seinare i livet. Det bidreg òg til mindre forskjellar, høgare arbeidsdeltaking og meir likestilling, seier Brenna.
Sjå kven dei 189 mest spreiddbygde kommunane er her.
Utviklinga i makspris i barnehage siden barnehageforliket
|
Dato |
Makspris (nominelle kroner) |
|
01.01.2013 |
2 330 |
|
01.01.2014 |
2 405 |
|
01.01.2015 |
2 580 |
|
01.01.2016 |
2 655 |
|
01.01.2017 |
2 730 |
|
01.01.2018 |
2 910 |
|
01.01.2019 |
2 990 |
|
01.08.2019 |
3 040 |
|
01.01.2020 |
3 135 |
|
01.01.2021 |
3 230 |
|
01.01.2022 |
3 315 |
|
01.08.2022 |
3 050 |
|
01.01.2023 |
3 000 |
|
01.01.2024 |
3 000 |
|
01.08.2024 |
2 000 |
Tabell over kor mykje familiar vil spare frå 1. august 2024
|
Samla foreldrebetaling (dersom ein betaler makspris) |
Pris per månad per 1.8 2021 |
Pris per månad 1. august 2024 |
Nominell endring per månad |
Nominell endring per år |
|
Eitt barn i barnehage – heile landet |
3 230 |
2 000 |
–1 230 |
–13 530 |
|
To barn i barnehage – heile landet |
5 491 |
3 400 |
–2 091 |
–23 001 |
|
Tre barn i barnehage – heile landet |
7 106 |
3 400 |
–3 706 |
–40 766 |
|
Eitt barn i barnehage – sentralitetsindeks 5 og 6 |
3 230 |
1 500 |
–1 730 |
–19 030 |
|
To barn i barnehage – sentralitetsindeks 5 og 6 |
5 491 |
2 550 |
–2 941 |
–32 351 |
|
Tre barn i barnehage – sentralitetsindeks 5 og 6 |
7 106 |
2 550 |
–4 556 |
–50 116 |