21 selskap søkjer om nytt leiteareal

– Det er svært gledeleg at selskapa framleis har stor tru på moglegheitene som ligg i vidare leiting på norsk kontinentalsokkel. Leiting og nye funn er avgjerande for å bremse det venta fallet i produksjon på 2030-talet. At me lukkast med å påvise og byggje ut nye felt er ikkje berre viktig for sysselsetting, verdiskaping og statlege inntekter her heime. Det er også viktig for energisikkerheita i Europa, seier energiminister Terje Aasland.

Tildeling i førehandsdefinerte område (TFO) er den årlege konsesjonsrunden for dei mest kjente leiteområda på norsk kontinentalsokkel som ikkje allereie er konsesjonsbelagt. TFO omfattar no størstedelen av dei tilgjengelege leiteområda på kontinentalsokkelen.

TFO 2024 vart lyst ut 8. mai 2024. Då søknadsfristen gjekk ut 3. september hadde departementet fått inn søknader om nye tildelingar frå til saman 21 selskap. Av konkurransemessige omsyn offentleggjer ikkje departementet det totale talet på søknader.

TFO-området blir utvida etter kvart som den geologiske kunnskapen i områda på norsk kontinentalsokkel aukar. I samband med årets konsesjonsrunde vart det forhåndsdefinerte området utvida i Barentshavet og Norskehavet.

Det blir lagt opp til å tildele nye utvinningsløyve i dei utlyste områda i starten av 2025.

Fullstendig utlysingstekst, oppdatert kart over utlyste blokker, HMS-, miljø- og fiskeriforhold og ytterlegare informasjon er tilgjengelig på nettsidene til Sokkeldirektoratet. 

Desse selskapa har søkt:

A/S Norske Shell

Aker BP ASA

Concedo AS

ConocoPhillips Skandinavia AS

DNO Norge AS

Equinor Energy AS

INPEX Idemitsu Norge AS

Lime Petroleum AS

M Vest Energy AS

OKEA ASA

OMV (Norge) AS

Pandion Energy AS

Petrolia NOCO AS

PGNiG Upstream Norway AS

Repsol Norge AS

Source Energy AS

Sval Energi AS

TotalEnergies EP Norge AS

Vår Energi ASA

Wellesley Petroleum AS

Wintershall Dea Norge AS

Bakgrunn

Før det kan tildelast løyve til petroleumsaktivitet i eit område på norsk kontinentalsokkel, må området vere opna for petroleumsverksemd. Det kan berre tildelast utvinningsløyve i område som er opna og tilgjengeleg for petroleumsverksemd.

Eit utvinningsløyve gir einerett til undersøking, leiteboring og utvinning av petroleum innanfor det geografiske området til løyvet. Utvinningsløyve blir normalt tildelt gjennom konsesjonsrundar. I ein konsesjonsrunde kunngjer departementet visse geografiske område der selskapa kan søkje om utvinningsløyve. På bakgrunn av søknadene som kjem inn, blir det tildelt utvinningsløyve til ei gruppe selskap på bakgrunn av saklege, objektive, ikkje-diskriminerande og på førehand kunngjorde kriterium. Departementet utpeikar ein operatør for kvart utvinningsløyve.

Dei årlege TFO-rundane blei innført i 2003. Målet var å leggje best mogleg til rette for å påvise og utvinne lønnsame ressursar i modne område før eksisterande infrastruktur blir stengd ned. TFO-konsesjonsrundane skjer årleg og innanfor eit førehandsdefinert område. Dette gir selskapa føreseieleg informasjon om kva område det er mogleg å søkje på. Det legg til rette for jamt påfyll av nytt leiteareal for selskapa, noko som er viktig for å få til ei effektiv utforsking i næringa. Over tid blir TFO-området utvida, basert på petroleumsfaglege vurderingar av kor modne områda er, og særleg behovet for stegvis leiting og utnytting av tidskritiske ressursar. I dag omfattar TFO-området størstedelen av det opna, tilgjengelege letearealet på norsk kontinentalsokkel.